Fokusi i qeverisë, Rama: Fiksimi ynë është që ”Shqipëria 2030” të ulet në tryezën e BE-së

“Fiksimi ynë është që Shqipëria e 2030 të jetë gati për t’u ulur në tryezën e familjes së bashkuar europiane”,-tha Edi Rama në një takim me gazetarët shqiptarë, pas Samitit Rajonal të Ballkanit Perëndimor me BE-në që u zhvillua në Kotorr, Mali i Zi.

I pyetur lidhur me deklaratën e presidentit serb, Aleksandër Vuçiç se integrimi mund të zgjasë me 5 vite dhe Ukraina mund të anëtarësohet më herët, kryeministri Rama tha se “tani që presidenti i Serbisë dhe Serbia të jetë më pesimiste se ne dhe se Shqipëria, kjo është gjëja më normale”.

“Ne nuk jemi Serbia, ne jemi Europa e Ballkanit dhe ne jemi Shqipëria, që me të drejtën e Zotit, edhe me të drejtën e popullit shqiptar kërkon të ulet në tryezën e Bashkimit Europian, dhe ndërkohë për këtë po punojmë në mënyrë të përditshme”, theksoi  më tej Rama.