FOTO/ ”Ksamili, një perlë e Mesdheut”, Rama: Përcaktojmë prioritetet e investimeve për zhvillimin e turizmit

Kryeministri Edi Rama vizitoi këtë të enjte Ksamilin, një zonë turistike që u bë trend sezonin e fundit veror nga vizitorët e huaj. Kjo zonë turistike që tashmë i ka tejkaluar kufijtë e Shqipërisë, dhe sipas kreut të qeverisë, do të kthehet në një perlë të Mesdheut, ndërsa synon të tërheqë pushues nga e gjithë bota.

“Ksamil, në zonën turistike që tanimë i ka tejkaluar kufijtë e Shqipërisë për t’u kthyer në një perlë të Mesdheut të shumëdëshirueshme për pushuesit nga e gjithë bota, përcaktojmë prioritetet e investimeve pjesë e programit të zhvillimit të turizmi”, ka shkruar kryeministri në një postim në Facebook.

Pjesë e vizitës së tij ishte edhe Mirela Kumbaro, Ministrja e Turizmit dhe Mjedisit dhe kryetari i bashkisë së Sarandës, Olti Çaçi. Sipas diskutimeve, në fokus do të jetë përshtatja për të rinjtë, sepse ata janë kryesisht vizitorët më të shumtë, ndryshe nga 5 vitet e fundit, ku ka pasur më shumë familjarë.

“Për të ndërtuar disa modele ndarjeje të këtyre hapësirave qoftë të rrugëve publike, qoftë të pjesëve private, të njëjtat modele do t’ua imponojmë ndërtuesve privat”, tha Kumbaro.
“Aeroporti i Korfuzit shërben edhe për të shkarkuar vizitorët e Ksamilit e Sarandës, deri sa të bëhet aeroporti i Vlorës”, shtoi ministrja.

Rama theksoi se ky plan duhet të jetë ambicioz, por nuk mund të rriten çmimet, pasi kjo do të ishte një zhgënjim për turistët. Kryeministri gjithashtu vizitoi edhe lagjet e Ksamilit të vjetër, ku gjithashtu do të bëhen investime, ndërsa në shtëpitë e vendasve nuk mungojnë portokallet, mandarinat apo ulliri.