FOTO/ Rama në Peshkopi: Plan investimesh publike e private për fuqizimin e turizmit të llixhave

Kryeministri Edi Rama inspektoi këtë të mërkurë dy rrugët e sapo përfunduara, që lidhin qytetin e Peshkopisë me fshatin Rabdisht, ndër 100 fshatrat e programit të posaçëm të turizmit rural.

I shoqëruar nga zv/kryeministrja Belinda Balluku, njëherësh ministre e Infrastrukturës dhe Energjisë, Rama inspektoi këto akse, ndërsa u shpreh se infrastruktura e re lidh po ashtu Peshkopinë me 3 fshatra të tjera, një zonë prodhuese e patates me klimë e natyrë të mrekullueshme, që njihet për turizmin e llixhave.

“Kjo është parajsë komplet, nuk diskutohet që këto akse e kanë hapur shumë perspektivën. Numri i bujtinave që rritet e tregon këtë, por duhet shtyrë më shumë përpara. Po mendojmë disa incentiva të reja”, u shpreh ai. Kryeministri siguroi se “turizmi i llixhave do të fuqizohet me një plan investimesh publike dhe private”.

“Llixhat duhet t’i marri një operator ndërkombëtar i strukturave që merret me ujërat termale. Ujërat termale në asnjë vend nuk i mban shteti. Janë me operatorë që bëjnë atë punë. Tani infrastruktura është bërë dhe Tirana është afër. Hyrja e rrugës së Maqellarës me Peshkopinë do mbarojë, edhe tuneli i Murrizit do mbarojë, se s’ka ku të shkojë, dhe pastaj gjithçka do të marri prapë një energji tjetër”, tha Rama.

Balluku theksoi se do të ristrukturohet pjesa e llixhave, pasi është një nga nuklat që sjell ekonomi tregu. “Në Peshkopi janë ndërtuar shumë njësi hoteliere, por duhet të organizohet situata”, tha ajo.