Gara për Durrësin. Duka: Fisi Koka do votojë për mua

Kandidati i Partisë Republikane për Bashkinë e Durrësit, Agron Duka, që pret të marrë edhe miratimin e PD-së, thotë se edhe një pjesë e elektoratit të majtë do të votojë për të. Duka është shprehur i bindur se të majtët do e votojnë atë. “Nëse do të jem zyrtarisht kandidati i të djathtës për Durrësin, kam besim se gjithë fisi Koka do të më votojë” – tha Duka për “Panorama”. Ai ka thënë ndërkohë se të ishte Vangjush Dako rivali i tij, do t’ia lehtësonte garën. “Kur Dako doli fillimisht në skenë, shumë njerëz kishin besim te ai. Por ai betonizoi Durrësin. Nëse do të rikandidojë, besoj se do të jetë një lajm i mirë për mua apo këdo që do të jetë kandidati i të djathtës në Durrës”, tha Duka. Ai shprehet se synon që të thithë sa më shumë elektorat të majtë, që të votojnë për të.