Gjiknuri refuzoi mbledhjen dje, Opozita: Veprim i gabuar, shihemi nesër në orën 12:00 në Këshill

Opozita e Bashkuar pranon ftesën e Partisë Socialiste për të vijuar diskutimet në tryezën e Këshillit Politik për reformën zgjedhore, i cili pritet të mblidhet mesidtën e nesërme.

Përmes një përgjigje zyrtare drejtuar përfaqësuesit të PS-së në këtë këshill, përfaqësuesit Oerd Bylykbashi i PD-së dhe Petrit Vasili i LSI-së, i kujtojnë Damian Gjiknurit se kjo mbledhje e radhës vjen në një kohë kur PS-ja nuk dha asnjë dakordësi për të zhvilluar mbledhje ditën e premte, si dhe refuzoi kërkesën e Opozitës për t’u mbledhur ditën e mërkurë.

Megjithatë, duke e konsideruar këtë si një veprim të gabuar të Gjiknurit dhe PS-së, por që nuk do përsëritet më, Bylykbashi dhe Vasili konfirmojnë pjesëmarrjen e tyre, duke propozuar që mbledhja të zhvillohet nesër në orën 12.00.

Përgjigja zyrtare e Opozitës së Bashkuar

Z.Gjiknuri.

Në mbledhjen e fundit të Këshillit Politik nuk pati asnjë dakordësi për të zhvilluar mbledhje ditën e premte. Ju, gjithashtu, refuzuat kërkesën tonë për mbledhje të Këshillit Politik ditën e mërkurë.

Kjo logjikë e funksionimit të njëanshëm është krejt e kundërt me mënyrën e ndërtimit dhe funksionimit të Këshillit Politik, ku qoftë ditët e mbledhjeve, ashtu edhe rendi i ditës janë dakordësuar konsensualisht më parë.

Megjithatë, duke e konsideruar këtë si një veprim të gabuar tuajin, por që nuk do përsëritet më, konfirmojmë pjesëmarrjen tonë dhe propozojmë që mbledhja të zhvillohet në orën 12.00.

Oerd Bylykbashi

Petrit Vasili