Gjiknuri: Zgjedhjet parlamentare mund të mbahen në prill të 2021-it. Do prekim dhe Kushtetutën

Damian Gjiknuri, bashkëkryetar i Komisionit Zgjedhor në emisioni në Report tv, “5 pyetje nga Babaramo”, në lidhje me Kodin Zgjedhor është shprehur se mendohet një spostim i zgjedhjeve në periudhën prill-maj ose tetor-nëntor.

Gjithashtu ka shtuar se edhe opozita ka rënë dakort me këtë, duke mos pasur kundërshtime. “Ka një dakordsi për të ndryshuar datën e zgjedhjeve, duke hequr muajt e nxehtë, qershorin, shtatorin si muaj potencialë zgjedhjesh, sepse realisht klima po ngrohet dhe vëmendja është tek turizmi, temperaturat janë të tilla që nuk lejojnë një fushatë të qetë”- është shprehur Gjiknuri.

Ai tha se do të vazhdohet me çështjet e mbetura, ku do të diskutohet të mërkurën në mbledhjen e ardhshme.

“Do t’i dëgjojmë të gjithë, pasi të gjitha palët janë me të drejta reale të barabarta. I kemi nisur disa pyetje ekspertëve nëse ndryshimet prekin Kushtetutën dhe do të shikohet se si do të qasemi. Sistemi aktual është shumë i mirë, nëse nuk arrijmë të gjejmë konsensus, do të jemi të gatshme të bëjmë kompromis. Hapja e listave mund të sjellë tensione të brendshme, ku secila parti të krijojnë koalicione sipas peshës”, ka thënë ai.

Sipas Gjiknurit, PD ka kërkuar duke i quajtur shumë të rëndësishme garancitë për ata që denoncojnë krime zgjedhore, duke i dhënë imunitet atyre.

“Mendohet edhe përfshirja e teknologjisë në zgjedhje apo identifikimin e zgjedhësve apo për shkeljet që bëhen. Jemi dakord të përfshijmë çfarë ka kërkuar opozita, por problemi është sa mund ta shtrijmë. Nëse është e pamundur, nuk mund të vihen zgjedhjet në pikëpyetje se nuk funksionon teknologjia. Ka forma alternative tradicionale, nëse nuk funksionin teknologjia, por do të marrim opinionin e ODHIR se sa mund ta shtrijmë”, është shprehur ai.

Gjiknuri theksoi se është rënë dakord për të reduktuar financimet private dhe të zëvendësohen me ato shtetërore gjatë periudhës së zgjedhjeve.