Grida Duma thirrje Alibeajt: Deklaro që nuk je nën hyqmin e Bashës

Në kafen e djeshme me 23 kolegët e saj në PD, deputetja Grida Duma i është drejtuar kreut të grupit parlamentar të PD-së, Enkelejd Alibeaj, që të deklarojë që nuk është nën hyqmin e Lulzim Bashës. Po ashtu Duma kërkon që të ngrihet një grup përfaqësues i PD-së dhe të bëhet një dialog i hapur me demokratët kudo nëpër Shqipëri.

”Erdha në respekt të dy kolegëve që na ftuan për kafe, për qetësinë dhe integritetin e paqtë të tyre. Erdha po ashtu me vëmendjen për t’u dëgjuar, e madje pres që këtu të flasë qartë kryetari i grupit, sepse ajo që ka marrë përsipër të bëjë ai, pas “hapit pas” të ish-kryetarit, është e madhe por po ashtu sfidë që kerkonte qartësi politike.

Asgjë nuk ka ecur si duhej! Sot po jua them të gjithëve, sepse erdha për të qenë e hapur, atë që i thashë kryetarit të grupit edhe veçmas që në fillesë; distancohu publikisht nga ish-kryetari dhe deklaro që nuk je nën hyqmin e tij, përndryshe do të jetë e dëmshme për ty vetë e për këdo tjetër që mban këtë qëndrim.

Përpos kësaj i kam kërkuar të ngrihet menjëherë, menjëherë, një grup përfaqësues i PD dhe të bëhet një dialog i hapur me demokratët kudo nëpër Shqipëri. Kurrë nuk u dol të flitet me demokratët hapur dhe pa doreza, si ndodhën ngjarjet dhe çfarë na pret në këto kushte”.