Hafizi: Këshilli i njohu shkeljet, por na akuzoi ne anëtarëve

Pas vendimit të Komisionit të Garancive Statutore, që i jep një gjysëm të drejte Ben Blushit dhe anëtarëve të tjerë të PS-së që kanë kërkuar zgjedhje të kryetarit, ka reaguar edhe deputetja Mimoza Hafizi.

“Sot morëm nga Komisioni i Garancive Statutore (KGS) Vendimin zyrtar lidhur me kërkesën e 12 anëtarëve të PS për interpretim dhe zbatim të një sërë shkeljesh të Statutit të Partisë Socialiste.  Duke falënderuar komisionin për përgjigjen, po i jap një sqarim të shkurtër kërkesave të shumta të medias.

KGS i njeh shkeljet, por nuk i përmend të gjithë shkelësit. Sepse fajin, sipas KGS, për mosmbledhjen për disa vite rresht të Kryesisë dhe Asamblesë Kombëtare nuk e ka kryetari, që duhej t’i mblidhte sipas Statutit, por vetë anëtarët e Asamblesë, pasi sipas Statutit nuk kanë mbledhur firmat e 1/3 së tyre, pra të 75 vetëve. Sipas KGS, një zgjidhje tjetër do të ishte të ushtrohej mocion mosbesimi ndaj kryetarit të partisë, por për këtë duhen firmat e 30 mijë socialistëve!

KGS thotë që në Partinë Socialiste, një organ ka legjitimitet derisa të zëvendësohet. Afati 4 vjeçar është thjesht matematikor!

KGS nuk e interpreton kërkesën tonë nëse mandati 4 vjeçar i kryetarit të PS është shkelur. Sipas këtij komisioni, ky fakt është i qartë, nuk ka nevojë për interpretim”, shkruan Hafizi në Facebook-un e saj.

Komisioni i Garancive Statutor përgjigje Dades, Blushit dhe Hafizit