Harta e re gjyqësore, Avokati i Popullit: Do sjelli përkeqësim të cilësisë së gjykimit 

Avokatët kanë paralajmëruar bojkot total të seancave gjyqësore, për shkak të miratimit të hartës gjyqësore nga KLGJ-ja, e cila sipas tyre është në shkelje të të drejtës së qytetarit për akses në drejtësi.

Avokati i Popullit, Erinda Ballanca thotë se harta gjyqësore ka një sërë problematikash, që nga kufizimi i aksesit tek ulja e besimit të qytetarëve te drejtësia. Për të e gjithë kjo është një lëvizje e detyruar nga mungesa e kapaciteteve njerëzore për shkak të Vettting-ut.

“Nuk ka diskutim që aksesi i qytetarëve te drejtësia kufizohet përmes hartës së re gjyqësore. E kemi bërë studim dhe kemi bërë një rekomandim që ua kemi dërguar edhe ministrisë së drejtësisë. Është lëvizje e detyruar për ta vënë sistemin në shina, sesa një hartë gjyqësore, se shkaku kryesor pse po bëhet është numri i vogël i gjyqtarëve që ne nuk kemi si ta adresojmë ndryshe. Kjo për shkak të mosparashikimit të atyre që bënë ligjin, që reforma do të ishte kaq e thellë me largimin e shumë gjyqtarëve nga sistemi, për shkak edhe të mos bashkëpunimit politik dhe për faktin se prej një viti nuk kemi magjistratë të rinj në sistem”.

Për Avokatin e Popullit, problemi i hartës së re gjyqësore nuk është kostoja e qytetarëve, por ulja e besimit te drejtësia dhe cilësia e gjykimit. Ballanca thekson edhe se i ka adresuar KLGJ-së disa rekomandime, pasi nuk ka marrë parasysh elementët thelbësore në hartimin e saj, që nga modeli i referencës së marrë.