Humbja drastike e PD në zgjedhje, Alizoti: Kemi defektet tona, ja kur nis analiza e brendshme

Deputeti i PD-së dhe drejtues politik në qarkun Elbasan, Tomor Alizoti flet për situatën politike pas zgjedhjeve parlamentare të 11 majit dhe për gabimet gjatë procesit. Ai u shpreh se vetë ka bërë shumë gabime personale, duke theksuar se PD-ja ka defektet e saj. Për të sistemi aktual politik dhe zgjedhor është i tillë që zgjedhje të ndershme nuk mund të zhvillohen.

“Me këtë sistem që është ndërtuar nuk ka zgjedhje. Nuk është vetëm kodi zgjedhor, por është një armatë e pushtetit që e bën të pamundur fitoren kudo”,-tha ai.

Deputeti theksoi rëndësinë e ruajtjes së demokracisë nga shteti dhe populli, duke paralajmëruar se nëse nuk mbahet ky ekuilibër, demokracia është shumë e brishtë dhe thyhet shpejt.

Në lidhje me analizën e brendshme në PD, Alizoti tha se ajo do të bëhet pasi strukturat e partisë të vendosin dhe pasi të përfundojnë denoncimet për zgjedhjet. ”Jam dakord të presim përfundimin e procesit të denoncimeve dhe më pas do të vijë koha për reflektim dhe analizë”.