IDP: Publikimi i të dhënave personale, lojë e rrezikshme

Patronazhistët dhe përdorimi i të dhënave personale për qëllime të fushatës elektorale nga ana e PS-së, ka tronditur dhe shqetësuar qytetarët shqiptarë, pasi të dhënat e tyre janë në dorën e çdo individi të PS-së. Zyra e Komisionerit për të Drejtën e Informimit dhe Mbrojtjen e të Dhënave Personale, ka reaguar lidhur me cënimin dhe përhapjen e të dhënave personale të shtetasve shqiptarë.

Përfaqësuesi Redi Skënderaj, në një deklaratë për mediat thotë se ka nisur një hetim administrativ për këtë çështje ndërsa shprehet se publikimi online i të dhënave përbën një lojë të rrezikshme dhe iu bën qytetarëve që të bëhen pjesë e këtyre skemave.

”Zyra e Komisionerit për të Drejtën e Informimit dhe Mbrojtjen e të Dhënave Personale po monitoron me kujdes situatën e krijuar nga cënimi dhe përhapja e paligjshme e të dhënave personale. Kjo shkelje e realizuar në një shkallë të gjerë, siç është rasti përbën shkeljen më të rëndë të jetës private. Kjo e drejtë është e sanksionuar në nenin 35 në Kushtetutën e Shqipërisë. Zyra e Komisionerit ka nisur një proces hetimi administrativ, rezultatet e të cilit do bëhen publike brenda afateve ligjore.

Zyra e Komisionerit vlerëson se ushtrimi i lirisë së shprehjes dhe të shtypit, kur në objekt të saj ka të dhëna personale, duhet realizuar duke pasur parasysh faktin se interesi i lartë publik dallon nga interesi për publikun. Rrjedhimisht çdo publikim mediatik, në faqe interneti apo aplikacione duhet të realizohet vetëm në përputhje me interesin publik.

Duhet të ndërpritet çdo veprim i kundërligjshëm që lidhet me publikimin e të dhënave personale të shtetasve. Qarkullimi dhe publikimi online i të dhënave në shumicën e rasteve rezulton tejkalim të interesit publik. Këto publikime dhe qarkullimi i të dhënave online përbëjnë një lojë të rrezikshme. Zyra e Komisionerit kërkon t’i jepet fund kësaj loje. Zyra e Komisonerit apelon çdo qytetar që mos të bëhet pjesë e skemave mashtruese të vëna në zbatim sepse siç po ndodh abuzimi me to mund të bëhet fare lehtësisht ndërsa riparimi i pasojave mund të jetë afatgjatë, madje i pakthyeshëm”,- u shpreh Redi Skënderaj.