Iftari i parë bën bashkë politikën, Presidenti Begaj: Ramazani është muaji i paqes, mëshirës hyjnore dhe solidaritetit

Iftari i parë i muajit të shenjtë të Ramazanit ka bërë bashkë disa prej figurave kryesore të politikës shqiptare. Në një darkë të shtruar nga Komuniteti Mysliman i Shqipërisë, ku i pranishëm ka qenë edhe presidenti i vendit, Bajram Begaj, të pranishëm kanë qenë edhe figurat kryesore të partive politike shqiptare.

Në postim në Facebook, kreu i shtetit shkruan se Ramazani është muaji i paqes, mëshirës hyjnore dhe solidaritetit. ”Është muaji i mirësisë ku dalin në pah cilësitë më të mira të njeriut si përkushtimi, toleranca, durimi dhe dashuria për Zotin e njëri-tjetrin. Gëzuar Muajin e Bekuar të Ramazanit! Të keni paqe e begati në familjet tuaja”,-shkruan Begaj.

Në të njëjtën tavolinë janë të ulur, kreu i Partisë së Lirisë, Ilir Meta, kryetari në detyrë i Partisë Demokratike, Enkelejd Alibeaj, kryebashkiaku i Tiranës, Erion Veliaj, sekretari i Përgjithshëm i PS-së. E pranishme në tavolinë me ta është edhe ambasadorja e Shteteve të Bashkuara të Amerikës, Yuri Kim.

Postimi i plotë

Ishte kënaqësi e madhe për mua t’i bashkohesha tryezës së iftarit të parë të muajit të shenjtë të Ramazanit. Ky muaj është një mundësi, në të cilën shqiptarët e besimit mysliman afrohen me Zotin nëpërmjet agjërimit dhe veprave të mira.

Dëshiroj t’i uroj agjërim të lehtë e të pranuar të gjithë besimtarëve. Ramazani është muaji i paqes, mëshirës hyjnore dhe solidaritetit ndërnjerëzor. Është muaji i mirësisë ku dalin në pah cilësitë më të mira të njeriut si përkushtimi, toleranca, durimi dhe dashuria për Zotin e njëri-tjetrin.

Gëzuar Muajin e Bekuar të Ramazanit! Të keni paqe e begati në familjet tuaja!

Agjërim të lehtë e të pranuar!