Intervistë e Kryetarit të Kuvendit, z. META në Ora News Tonight IlvaTare

 

 

Ilva Tare – Mirëmbrëma, të nderuara zonja dhe zotërinj!

Sot do të flasim për një parti që mund të konsiderohet si faktor në këto zgjedhje, pra në zgjedhjet vendore të 21 qershorit, ditën e diel, faktori LSI.

(Insert.)

Ilir Meta, faleminderit që jeni në studion e emisionit “Tonight”!

Ilir Meta– Faleminderit për ftesën!

Ilva Tare – Sapo ka përfunduar një takim që personalisht do ta konsideroja gati demonstrim force në Lezhës. Ishte një pamje spektakolare e një mitingu përmbyllës elektoral.

Ilir Meta– Nuk ka qenë demonstrim force, por ka qenë demonstrim kulture. Pra, një organizim mjaft i kulturuar, ku nuk ka thirrje, nuk ka brohoritje, nuk ka britma, por është krijuar një mjedis vërtet europian në një shesh të një qyteti, të cilin me të drejtë Kryeministri Rama e quajti një thesar të historisë, që dikur ishte mbuluar nga ferrat dhe që tani ka dalë në dritë. Kjo tregon sesi do të jetë e gjithë Bashkia e madhe e Lezhës  pas 21 qershorit.

Ilva Tare – Ju çfarë prisni, jeni optimist për rezultatin në Lezhë, pavarësisht se kandidati juaj garon për një mandat të tretë?

Ilir Meta– Nuk jam aspak optimist, jam shumë realist. Kandidati ynë garon me veten e tij, në kuptimin e programit që ka dhe pritshmërive që kanë të gjithë qytetarët e Lezhës për bashkinë e madhe. Ai është një kandidat mjaft i sprovuar dhe nuk shoh ndonjë kandidat tjetër, pavarësisht është një kandidat, i cili garon për herë të katërt, sepse ka qenë tre herë kryetar komune i PD-së dhe është e drejta e tij të konkurrojë.

Ilva Tare – Jeni i bindur se do të fitoni në Lezhë?

Ilir Meta– Nuk ka asnjë arsye pse të mos jem më shumë sesa i bindur, por sidoqoftë ne çdo gjë ua lëmë qytetarëve, do të respektojmë votën e tyre.

Ilva Tare – Megjithatë, sigurisht pritshmëritë do të dalin nga kutitë më 21 qershorit, ju keni edhe sondazhet tuaja. Në fakt, ne nuk e kemi, IPR Marketing nuk e ka një sondazh për Lezhën. Ju e keni një të tillë, si e nxjerr rezultatin?

Ilir Meta– Ne nuk është se kemi sondazhe vetëm për Lezhën, ne në përgjithësi kemi sondazhe për të gjithë vendin. Ne i respektojmë edhe sondazhet e IPR Marketing, siç kemi bërë edhe në të kaluarën, por gjithmonë i shumëzojmë me dy kur bëhet fjalë për faktorin LSI.

Ilva Tare – Në rastin e Lezhës si i keni sondazhet?

Ilir Meta– Nuk diskutohet, sondazhet janë mjaft pozitive.

Ilva Tare – Nuk diskutohet fitorja.

Ilir Meta– Absolutisht nuk diskutohet, megjithatë zgjedhjet prandaj bëhen, që të verifikohet fitorja dhe çdo rezultat. Rëndësi për ne kanë standardet dhe fushata në Lezhë ka qenë mjaft e kulturuar dhe e qytetëruar, siç u takon të gjithë lezhjanëve. 

Ilva Tare – Meqenëse përmendët standardet, zoti Meta, shpeshherë keni bërë thirrje edhe nga foltorja e Kuvendit që të mos tensionohet në mënyrë të panevojshme situata. Për ju, për LSI-në, por edhe për maxhorancën, me sa duket, më i rëndësishëm se rezultati është procesi. E keni seriozisht këtë deklaratë?

Ilir Meta– Absolutisht, ne kemi bërë çdo gjë për të respektuar standardet dhe çdolloj tensionimi është tërësisht artificial dhe nuk shohim nga opozita që të ketë një qëndrim të tillë, që edhe për ne kryesore janë standardet, jo rezultati. Kështu që ne kemi punuar për këtë gjë në vijimësi, nuk jemi sjellë si PD-ja, e cila në prag të zgjedhjeve të vitit 2013 bëri një ndryshim të dhunshëm të përbërjes së KQZ-së, me idenë që ata ishin shumica dhe duhet të kishin shumicën  në KQZ, duke tensionuar situatën dhe duke e lënë KQZ-në 4 me 0. Ne, përkundrazi, mund të bënim të njëjtën gjë, pra në mënyrë të ligjshme të riparonim një gabim që bëri PD-ja dhe të kthenim raportet që ishin në KQZ, por nuk e bëmë këtë gjë, sepse nuk besojmë se zgjedhjet varen nga KQZ-ja apo Kolegji Zgjedhor, por nga vota e qytetarëve shqiptarëve. Vota e qytetarëve shqiptarë absolutisht që do të jetë një votë e shprehur në mënyrë më demokratike edhe falë medieve, sepse i kushtojmë shumë rëndësi KQZ-së, komisionerëve, por këtu e gjithçka ndodh në një vëzhgim të pandërprerë të medieve anembanë vendit dhe për këtë dua t’i falënderoj të gjitha dhe të vazhdojnë të jenë të vëmendshme, të monitorojnë gjithçka, çdo fenomen negativ dhe çdo element pozitiv.

Ilva Tare – Natyrisht janë edhe vëzhguesit ndërkombëtarë dhe ata lokalë që po i ndjekin, po i monitorojnë.

Ilir Meta– Ne vazhdimisht kemi bërë thirrje për sa më shumë vëzhgues ndërkombëtarë, për sa më shumë vëzhgues lokalë dhe të shkojnë kudo, sidomos atje ku opozita paraqet  pretendime se mund të ketë tensione, presione.

Ilva Tare – Meqenëse e prekëm pak KQZ-në, raporti i ndërmjetëm i OSBE-ODIHR-it, ndër të tjera thoshte se KQZ-ja në njëfarë mënyre ka krijuar disa shqetësime për paanshmërinë e vendimeve që ka marrë deri tani. Jeni i shqetësuar se kjo mund të komprometojë edhe procesin në fund?

Ilir Meta– Unë nuk shqetësohem për të gjitha raportet e ndërmjetme, sepse ato janë rezultat i konsideratave të vazhdueshme në proces dhe absolutisht që raporti i OSBE-ODIHR-it do të shihet me shumë vëmendje në fund. E theksova edhe një herë, ne, ndryshe nga PD-ja, e cila e ndryshoi KQZ-në në mënyrë arbitrare dhe kundër paralajmërimit të ndërkombëtarëve një muaj përpara zgjedhjeve,  vepruam krejt ndryshe, respektuam ato raporte shumice që kishte vendosur me forcë PD-ja, sepse nuk mendojmë se kjo është punë KQZ-je, punë Kolegji Zgjedhor, punë komisionerësh, punë numëruesish. Mendoj se gjithçka është transparente në këtë vend edhe falë medieve sidomos, kudo anembanë vendit. Incidenti më i vogël raportohet menjëherë, verifikohet dhe është në vëmendjen e opinionit.

Ilva Tare – Është e drejtë që nuk bëtë një ndryshim ligjor në KQZ, por  gjatë votimeve që janë dashur të bëhen deri tani,  kryetarja, zonja Luzi, ka bashkuar votat me maxhorancën. Keni bërë një  ndryshim të butë, le të themi?

Ilir Meta– Ne nuk e shohim KQZ-në si maxhorancë-opozitë, ky ka qenë koncepti i PD-së. Për ne ata duhet të respektojnë ligjin dhe duhet të përgjigjen para ligjit.

Ilva Tare – Dakord.

Personalisht, ju si LSI nuk keni probleme me Komisionin Qendror të Zgjedhjeve deri tani?

          Ilir Meta– Natyrisht, kemi pakënaqësitë tona për vendime të caktuara të Kolegjit Zgjedhor, por jemi të detyruar t’i respektojmë e të mos i komentojmë.

          Ilva Tare – I kthehemi pak fushatës dhe klimës. Keni bërë shumë zgjedhje që nga viti 1992 dhe me siguri keni shijen e çdo procesi zgjedhor që keni kaluar. Si ju duket ky i tanishmi?

          Ilir Meta– Janë zgjedhjet më të qeta që ka pasur ndonjëherë vendi. Shikoj një angazhim mjaft të qetë në përgjithësi, përveç zonave të caktuara, ku më shumë dominojnë interesa të caktuara, të politikanëve të caktuar, sesa shqetësime konkrete që kanë të bëjnë me ecurinë e procesit. Ka një përpjekje për të sajuar e fabrikuar incidente, histori kot, që në shumë raste nuk ndodhin.

          Ilva Tare – E kujt është kjo përpjekje, zoti Meta?

          Ilir Meta – Kuptohet që kjo përpjekje është e opozitës.

          Ilva Tare – Çfarë interesi ka opozita që në pozicionin që është, të denoncojë incidente jo reale? Ju i quajtët të fabrikuara, madje.

          Ilir Meta – Unë mendoj se janë të fabrikuara, sepse duket qartë që opozita ka një shqetësim për rezultatin e zgjedhjeve, në vlerësimin tim – mund të jem i gabuar – dhe kërkon të justifikojë rezultatin e zgjedhjeve, duke dëmtuar standardin e tyre. Opozita nuk është shprehur asnjëherë, siç jam shprehur unë, apo siç janë shprehur të tjerë nga maxhoranca, që për ne është standardi i zgjedhjeve, jo rezultati. Duke harruar që këto janë zgjedhje vendore, nuk janë zgjedhje politike, opozita thotë, ose më saktë zoti Basha, sepse opozita ka disa qëndrime – këtu mund të ndalemi më vonë, pasi ka edhe qëndrime të moderuara, siç është ai më i fundit i zonjës Duma, që tha se, po fitoi, do të bashkëpunojë me Kryeministrin për të mirën e Durrësit: të njëjtën gjë ka thënë edhe zoti Kosova – ndërsa zoti Basha ka thënë, në mënyrë të vazhdueshme dhe kokëfortë: “Ne do të fitojmë. Do të bëjmë një referendum, pastaj do të heqim qeverinë pas këtyre zgjedhjeve”. Për të hequr qeverinë, kuptohet që duhen 71 vota. Në këtë paqartësi që është opozita, përpiqet të sajojë gjëra të paqena, siç ishte, për shembull, rasti më i freskët që kandidatit të PD-së në Pogradec i paskan çuar një SMS. Sapo e mora vesh, bëra një deklaratë publike, duke dënuar këtë gjë, duke kërkuar që të hetohet dhe të nxirren përgjegjësit. Mora edhe ministrin e Brendshëm etj. Mësojmë sot që zoti Basha vete në Pogradec dhe thotë që këto gjëra i bën LSI-ja, kur zoti Basha e di shumë mirë se kandidati që ka vajtur me PD-në para dy muajsh, sepse ka qenë socialdemokrat, e dinë të gjithë në Pogradec, para se të shkonte atje, ka ardhur me shumë mënyra tek unë, që të vihej si i LSI-së, sepse u fol që LSI-ja mund të merrte Pogradecin.

Natyrisht, ne kemi një kandidate të shkëlqyer, siç është arkitektja Diana Mile. E përmenda këtë rast për të thënë se nuk kemi ndonjë shqetësim të madh nga kandidati i PD-së dhe kërkojmë ta heqim nga gara. Absolutisht jo! Fitorja jonë në Pogradec është mbi 80%. I urojmë fushatë të mbarë kandidatit të PD-së! I kam kërkuar ministrit Tahiri të marrë masa që ta forcojë sigurinë e këtij kandidati dhe të hetojë për çështjen në fjalë. Kjo ishte për të treguar se ka një amplifikim banal.

          Marrim një rast tjetër. Vëllai i kandidatit të PD-së në Vaun e Dejës, zotit Zef Hila, kishte pasur një debat dhe konflikt me një punonjës të policisë, që gjoja qe nxitur nga maxhoranca. Ndërkohë, për këtë rast, edhe pse prokuroria e gjykata nuk i verifikuan këto pretendime, menjëherë u morën masa dhe ky person u largua nga detyra që kishte në qarkun e Shkodrës. Por këto janë gjëra fare të vogla, të cilat, në të shumtën e rasteve nuk qëndrojnë, por edhe kur qëndrojnë, nuk kanë lidhje fare me klimën e përgjithshme dhe elektorale. Pra, ka shumë zhurmë për asgjë, ose, le të themi, për pak gjë.

          Ilva Tare – Ndalojmë pak te rasti i Pogradecit. Besoj, e thatë për herë të parë këtë, që kandidati ka dashur të kandidojë nën siglën e LSI-së.

           Ilir Meta – Është e vërtetë. Mos të them edhe personat që më kanë ardhur mua dhe që janë aktivistë të PD-së, por edhe miqtë e mi.

          Ilva Tare – Arsyeja që nuk e kandiduat, ishte se ju e kishit kandidaten tuaj për Pogradecin?

           Ilir Meta – Ishte njeri jo shumë i besueshëm, sepse kishte ndryshuar disa parti. Së fundi, ishte socialdemokrat. Kishte edhe disa probleme të tjera. Nuk ishte figurë e përshtatshme për në Pogradec. Ne donim një figurë të re. Figura që kemi gjetur është perfekte.

          Ilva Tare – Nuk kishte arsye pse të kërcënonit një kandidat.

          Ilir Meta – Është një intelektuale, një pedagoge, një arkitekte me shumë eksperiencë, energji dhe pozitivitet.

          Ilva Tare – Megjithatë, ju keni bërë një spot javën e shkuar, ku u bëni thirrje qytetarëve shqiptarë, besoj edhe elektoratit të LSI-së, që të jenë të kujdeshëm dhe të denoncojnë çdo rast.  Në një farë mënyre kjo legjitimon frikën se po ndodh diçka me shitblerjen e votës. Ka një fenomen apo një rrezik real.

Ilir Meta– Rasti i Vorës e tregoi më së miri këtë, kur qytetarët denoncuan kryetarin aktual të bashkisë së Vorës, të PD-së, i cili u kishte dhënë zarfe për vota. Kjo është një çështje në hetim. Më vjen shumë keq që deputetë të PD-së, në mënyrë krejtësisht të papërgjegjshme, u përpoqën të bllokojnë veprimet e policisë në administrimin ligjor të provave për këtë rast. Në rastin konkret, për të administruar kamerat e Agro-Blend, ku pretendohej nga qytetarët se ishin thirrur përmes kryeplakut të PD-së te kryetari i bashkisë dhe ai u kishte dhënë zarfet. Pra, kemi një tendencë të PD-së, sipas mendimit tim, që vjen nga dy faktorë. Së pari, e ndiejnë që nuk janë në një gjendje të mirë elektorale, kanë kohë që e ndiejnë, dhe kanë hequr dorë prej kohësh nga gara me PS-në. Pra, nuk ka një garë në këto zgjedhje të PD-së me PS-në. Ata e kanë pranuar supremacinë e PS-së si forcë e parë dhe me një shkëputje të qartë. Tani i vetmi shqetësim i tyre është që të mbajnë vendin e dytë. Sipas të dhënave të tyre, kanë shqetësimin  e rritjes së Lëvizjes Socialiste për Integrim, prandaj edhe përqendrimi  i të gjithë fushatës së tyre  me karakter negativ,  spekulues dhe  bazuar mbi shpifje është ndaj Lëvizjes Socialiste për Integrim.

Ilva Tare –Po thoni që këtë gjë Partia Demokratike e  bën se ndien një rivalitet ndaj LSI-së  në garën elektorale?

Ilir Meta– Unë e kam bindje që Partia Demokratike ka hequr  dorë nga gara me Partinë Socialiste. Pra, e kupton që Partia  Socialiste është forcë e parë  e padiskutueshme dhe  e vetmja garë që i mbetet është të ruajë vendin e dytë, duke u përpjekur për të dëmtuar Lëvizjen Socialiste për Integrim, por, për fat të keq, po përpiqet të cenojë edhe standardin e  zgjedhjeve. Patëm disa akuza…

Ilva Tare – Ju lutem, se kjo është e rëndësishme, në vend të dytë me numër bashkish apo  me numër votash?

Ilir Meta– Me të dyja.

Ilva Tare – Po ju e keni këtë garë me Partinë Demokratike?

Ilir Meta – Jo, nuk e kemi fare. Ne kemi vetëm shqetësimin  që të shkojnë mbarë zgjedhjet. Kemi dëshirë të fitojmë sa më shumë bashki në të gjithë vendin. Nuk kemi 15 kandidatë, por  kemi 61, sepse ne i konsiderojmë të 61 kandidatët  si  kandidatët e Lëvizjes Socialiste për Integrim. Është populli shqiptar ai që do të vendosë.

Të vijmë te  standardet. Kemi pasur disa akuza,  disa shpifje të Partisë Demokratike në këtë drejtim. Ne jemi të drejtpërdrejtë dhe i kemi gjërat e  hapura. Nuk kemi  gjë për të shmangur. Kemi  pasur   akuza sikur po blihen vota në Shkodër. Kemi pasur edhe një foto të një personi, një përrallë, në një zyrë gjoja të LSI-së, pa emër personi, pa adresë zyre, botuar  në gazetën “Rilindja Demokratike” dhe ku e di unë. Çfarë kemi bërë ne? Ku dallojmë ne nga PD-ja, për sa i  përket  shqetësimit  për standardin e zgjedhjeve? Sekretari i Përgjithshëm i LSI-së, zoti Luan Rama, ka marrë gazetën e “ Rilindjes Demokratike” dhe ka bërë padi në gjykatë për këtë çështje, me qëllim që kjo gjë të verifikohet. Në rast se ky person është i tillë që i përket LSI-së dhe këtë gjë duhet ta sqarojë PD-ja, sepse ajo e  ka botuar në gazetën e saj zyrtare, atëherë shumë mirë ky person të dënohet. Ne  do ta çojmë më tej  këtë çështje, do ta çojmë në prokurori.  Në rast se jo, pra në rast se kemi të bëjmë me një fotomontazh, me një sajesë, me një shpifje, atëherë “Rilindja Demokratike” dhe Partia Demokratike duhet të mbajnë përgjegjësinë e tyre, sepse ne besojmë se ekziston rreziku i shitblerjes  së votave. Vetëm ditët e fundit kemi raste konkrete në Vorë, kemi me miell, edhe me zarfe. Është kandidati i Vorës që është i PD-së, mund të ishte i LSI-së, mund të jetë i PS-së, mund të jetë i një  partie tjetër, nuk ka rëndësi, po flasim për fenomenin. Ne jemi për t’u ballafaquar drejtpërdrejt me fenomenin në rrugë ligjore dhe jo me llafe, me shpifje, sepse me llafe  dhe me shpifje do të thotë thjesht të dëmtosh një proces për arsye se t’i ke frikë  se mund të humbasësh dhe do të justifikosh rezultatin apo humbjen. Ky është një dëm për procesin  dhe nuk është një mesazh i mirë as për votuesit dhe as për funksionimin e këshillit ligjor.

Kemi pasur disa raste ku në parlament na  është thënë:  po ju, pse nuk i bashkoheni shqetësimit tonë për  këtë  gjë, për të dënuar këtë fenomen, atëherë ne iu përgjigjëm shqetësimit të PD-së, i shprehur sidomos nga deputeti Aldo Bumçi, por edhe  nga të tjerë dhe bëmë një spot të drejtpërdrejtë që e kanë parë të gjithë shqiptarët. Jemi  shumë të kënaqur që ka reagime konkrete. I ftojmë të gjithë qytetarët të denoncojnë jo vetëm kandidatë, apo përfaqësues të Partisë Demokratike, por edhe të LSI-së, të PS-së, kushdo që do të guxonte të bënte këtë fenomen. Ne nuk do të kemi keqardhjen më të vogël për të mbajtur qëndrim ekstrem ndaj cilitdo, kushdo qoftë ai.

Partia Demokratike ka një standard tjetër: ajo ka dëshirë të shpifë, ndaj mbron veprime të tilla. Kemi një rast konkret, rast  kokëfortë, sado  që ata  të bëjnë zhurmë për të mbuluar fakte,  kjo është një çështje e  tyre, siç është një fakt mjaft i rëndë që ta dinë të gjithë demokratët që na dëgjojnë, se këta kanë çuar 600 vetë në mënyrë fiktive në Vorë për  t’i shtuar, ku shumë nga këta janë votues të sigurt demokratë dhe të afërm të eksponentëve dhe të deputetëve të PD-së, të cilët jetojnë në Tiranë, që duhet të ishin votues të Halim Kosovës, por janë çuar prej disa kohësh në Vorë, në mënyrë të manipuluar, vetëm Shaban Gjoka, një noter, ka bërë 500 kontrata  atje. Kryetari i PD-së në Vorë, përveç familjes  së vet, mban edhe 19 vetë të tjerë në ngarkim, që  i mban në familje, drejtori i Urbanistikës, edhe ai ka 20 e ca e ku  di unë. Këto janë standardet e tyre.  Ne jemi për këtë gjë: hajdeni t’i respektojmë standardet njëlloj të gjithë! Nuk po themi që njëra palë është e kulluar dhe pala tjetër  është sterrë. Jo, nuk po themi këtë gjë, por, nëse do të ngremë një shqetësim, të mos përdorim standard të dyfishtë, që kur na intereson të themi se këta po shkelin, por kur e  bëjmë  ne vetë të themi: këta po na sulmojnë politikisht  dhe kështu me radhë. Kjo gjë nuk shkon. Partia Demokratike ka një problem  të madh të besueshmërisë dhe të seriozitetit të saj në raport me votuesit, por kjo është një çështje e saj.  A u nda  Tirana  për katër vota para 4 vjetësh?

 Ilva Tare– Po.

Ilir Meta– Po sikur doktor Halimi të mos fitojë për një votë, a do të ndiejnë    përgjegjësi këta, të cilët e kanë zhvendosur betejën në Vorë? Nuk jemi ne  që e kemi zhvendosur atë  në Vorë. Janë këta, sepse këta kanë zhvendosur votuesit nga Tirana, votues demokratë, ia kanë hequr Halim Kosovës dhe i kanë çuar për Fiqon në Vorë. A është logjike kjo? Është më e rëndësishme Vora  politikisht apo është Tirana politikisht për opozitën?

Ilva Tare– Kjo është pyetje për opozitën. Pyetja për ju është: pse është e rëndësishme Vora  për LSI-në?

Ilir Meta– Përgjigja ime është e drejtpërdrejtë:  ajo është shumë e rëndësishme për arsye se kandidati i propozuar në Vorë është një kandidat  i propozuar nga LSI-ja, pavarësisht se mbështetet nga i gjithë koalicioni.

E dyta, është shumë e rëndësishme për një arsye të vetme, sepse Bashkia e Vorës do të bëhet një model  për  shërbimet dhe për punësimin në nivel  kombëtar. Brenda dy vjetësh, jo  katër vjetësh që do të jetë mandati, besoj  i kryetarit të ardhshëm, zotit Luan Sallaku  i Aleancës për Shqipërinë Europiane, nuk do të ketë asnjeri pa punë në Vorë. Njerëzit të mos rrinë dhe të presin një herë në katër vjet  të marrin një zarf me 10 mijë lekë të rinj, absolutisht. Çdo njeri të ketë punën e  vet, të përgatitet dhe të formohet profesionalisht për të shkuar në punë. Pse në Vorë, do të thoni ju? Këtë gjë unë mund ta thosha në Kolonjë. Nuk e premtoj dot këtë gjë në Kolonjë, atje do të premtoj diçka tjetër.

Ilva Tare– Pse e premtoni një gjë pikërisht në Vorë? Pse jeni kaq  i sigurt se mund ta bëni këtë gjë në Vorë?

Ilir Meta –Sepse Vora është një vend që ka një akses të jashtëzakonshëm për të  realizuar investime të rëndësishme vendase, të huaja dhe  këto investime kanë qenë peng edhe për shkak të mënyrës se si është drejtuar bashkia e Vorës. Mënyra e re do të jetë krejtësisht transparente. E vetmja gjë që do t’u kërkohet investitorëve shqiptarë apo të huaj do të jetë prioriteti për të punësuar në radhë të parë nga komuniteti aty dhe më pas kuptohet dhe nga të gjitha zonat e tjera.

Ilva Tare– Kaq është rëndësia e votës për LSI-në?

Ilir Meta– Kjo është e vetmja rëndësi, asnjë gjë tjetër. Ne nuk kemi hequr asnjë votues nga Tirana për ta çuar në Vorë. Janë eksponentët e Partisë Demokratike që i kanë hequr njerëzit e tyre nga Tirana dhe i kanë çuar në Vorë. I kanë hequr nga votues të Halim Kosovës, i kanë çuar votues për te Fiqo. Ndërkohë që Tirana u nda vetëm për 10 vota para 4 vjetësh. Këtë më thoni mua dhe…

Ilva Tare– Prokuroria po heton dhe duhet të presim se çfarë do të dalë në përfundim.

Ilir Meta– Prokuroria të hetojë, kanë mbështetjen tonë të plotë, të mos dorëzohet para presioneve. Kam dhe një thirrje për policinë, sepse sulmet që bëhen ndaj policisë nuk bëhen se policia po ndërhyn, sepse nuk është policia që ka çuar qytetarët te Fiqiri Ismaili për të marrë zarfet. Është kryeplaku i Partisë Demokratike. I kanë parë njerëzit dhe dëshmitë që kanë dhënë për televizionet.

Ilva Tare– Është edhe kjo fotografia që ka publikuar Partia Demokratike.  Shefi i komisariatit që po pi kafe bashkë me drejtorin e AKU-së, që është i LSI-së.

Ilir Meta– Unë nuk e di fare se kush është shefi i komisariatit, as nuk i njoh fare. Shumë mirë ka bërë që e ka publikuar. Ta çojë në prokurori në qoftë se ka ndonjë problem kjo çështje. As e njoh fare se kush është shef komisariati.

Ilva Tare– Vendimi i tyre është që është vënë në funksion të fushatës për kandidatin e LSI-së.

Ilir Meta– Unë nuk njoh fare as shef komisariati, as drejtor AKU-je. Nuk kanë asnjë lidhje me LSI-në.

Ilva Tare– Në titull personal jo, por që mbështesin LSI-në.

Ilir Meta– Nuk kanë lidhje fare me LSI-në. Unë di këtë gjë: kanë dalë qytetarët dhe kanë thënë që kryeplaku i Partisë Demokratike i mori dhe u tha që i do kryetari, se do të japin punë te Agroblendi.  Qytetarët kanë shkuar te Agroblendi. Ai u ka dhënë zarfet në vend që të jepte punë. Ata pastaj kanë shkuar në stacionin e policisë, kanë bërë denoncimin, e kanë bërë ata, jo policia. Policia ka shkuar për të administruar kamerat për të  vërtetuar nëse kanë qenë te Agroblendi apo  gënjejnë, ndoshta ndonjë blof, lojë e bërë nga dikush tjetër. Atje kanë shkuar deputetët e Partisë Demokratike që nuk kanë lejuar policinë të administrojë kamerat. Se çfarë shqetësimi kanë këta dhe pse duhet ta bëjnë këta këtë gjë kur janë të bindur që procesi i tyre është i ndershëm dhe kandidati i tyre është duke vepruar në mënyrë transparente, unë nuk e di këtë gjë. Këto di unë. Të tjerat janë fjalë, nuk janë fakte.

Ilva Tare– Mund t’ju pyes për diçka që besoj se e dini. A ka një përqendrim të administratës së LSI-së në Vorë?

Ilir Meta– Përqendrimi i LSI-së është zoti Luan Rama dhe zonja Nora Malaj. Këta janë njerëzit që koordinojnë fushatën. Dhe ka një fushatë të jashtëzakonshme dhe jashtëzakonisht të kulturuar.  Me mijëra gra që marrin pjesë, me mijëra të rinj që marrin pjesë, me qindra veteranë që marrin pjesë. Cili është shqetësimi? Është bashkuar e gjithë e majta në Vorë, se Vora e majtë ka qenë historikisht.  Por me format, ato përçarjet që ka pasur e majta dhe këto lojërat e këtij kryetari ka pasur ato probleme që ka pasur në të kaluarën. Shqetësimi është një përkrahje mbarëpopullore për Aleancën për Shqipërinë Europiane  në Vorë. Ky është i vetmi shqetësim.

Ilva Tare– A erdhën analizat e miellit për aflatoksinë?

Ilir Meta– Mund të pyesni ministrin. Besoj që ministri mund të vijë këtu bashkë me zotin Fiqo, në debat bashkë me AKU-në me fakte, dokumente.

Ilva Tare– Sepse nga Partia Demokratike u quajt si sulm politik ndaj kandidatit.

Ilir Meta– Partia Demokratike çdo gjë që nuk shkon sipas interesit të saj e quan si një luftë politike dhe çdo gjë tjetër e quan si një e drejtë e saj sublime. Tani jemi mësuar me standardet të dyfishta të Partisë Demokratike. Partia Demokratike flet për dekriminalizim dhe kandidon një person që është dënuar nga gjykata.  Mos të merremi me këtë histori tani.

Dhe tjetra, ne kemi thënë që në Vorë të vijnë vëzhguesit ndërkombëtare, shkoni ju si televizion, fotografoni, filmoni, bëni çdo gjë.

Ilva Tare– Sot i kemi filmuar këto.

Ilir Meta– Unë po them të shkoni përditë atje. Ne fushatën e bëjmë të hapur dhe ne do ta fitojmë Vorën në bazë të një programi që kemi. Në qoftë se kjo quhet terror, presion, manipulim, le të quhet, nuk ka asnjë problem. Premtimi ynë është ky: në Vorë brenda 2 vjetësh do të punësohet çdo njeri nga Vora. Kaq. Mbas 2 vjetësh e verifikojmë. Ju regjistrojeni. Madje kemi thënë dhe këtë tjetrën, që ne do t’u ofrojmë një mundësi të dytë për punë. Në qoftë se dikush nuk do të punojë, se ka dhe njerëz që nuk duan të punojnë në përputhje me arsimin e tyre, me formimin e tyre, ne do t’u lutemi të na e japin me shkrim që unë nuk dua të punoj në mënyrë që ne të jemi në rregull me këtë premtim që po bëjmë. Ky është premtimi ynë, asgjë tjetër më shumë.

Ilva Tare– Do të jeni në sikletin për ata që nuk do të pranojnë të punojnë, aq shumë vende pune do të hapen në Vorë.

Ilir Meta– Për ata që janë aty do të ketë punë për të gjithë. Kjo është e padiskutueshme. Do të shkojnë të punojnë dhe nga zona të tjera.

Ilir Meta– E keni lexuar letrën e Astrit Patozit se po na vrasin para syve tanë?  Është letër e hapur ku ju quante strateg të fenomenit të blerjes së votës.

Ilir Meta – Se kush është Astrit Patozi mjafton kjo gjë që shkon atje pengon policinë për të administruar një provë mbas denoncimit që kanë bërë 2 qytetarë se u ka dhënë zarfe për të blerë votat kryetari i bashkisë. Unë nuk do ta  bëja kurrë këtë gjë në qoftë se policia do të shkonte të administronte kamerat te biznesi të kandidatit të LSI-së, që do të akuzohej për këtë gjë; nuk do ta bëja kurrë që të shkoja atje t’i thosha policisë që në asnjë mënyrë të mos preknin kamerat. Përkundrazi, do t’u thosha: prekini. Ky e ka bërë këtë veprim, të shkojë në burg. Kjo është e para.

E dyta, se kush po tregohet Astrit Patozi mua më vjen keq, se e kam njohur për serioz.

Ilva Tare– Jo, të mos merremi me zotin Patozi, por me shqetësimet që ka ngritur.

Ilir Meta– Jo, me shqetësimin po merrem. E kam njohur për serioz.  Që ta dini ju, ta dinë dhe qytetarët u habita shumë kur e dëgjova herën e fundit, se tani njerëzit i kap dhe paranoja ndoshta, të thoshte, se më tha dikush që, kur dole fole ti në parlament para ca ditësh për Vorën, se ai vetëm Vorën ka merak, u fut një reklamë në media. Ndoshta mos Meta ka urdhëruar televizionin që të vendosë  reklamë për t’i ndërprerë fjalën Astrit Patozit? Pra, nuk ia vlen, mendoj unë, me njerëz të cilët kanë një mbivlerësim kaq të madh për veten dhe të cilët nuk kanë asnjë respekt për standardin e zgjedhjeve. Ka qenë 12 vjet deputet Astriti atje, ka qenë 12 vjet kryetar bashkie Fiqiriu. Dhe Vora, që ka një pozicion të jashtëzakonshëm strategjik për zhvillimin, për shkak se është në mes të të gjitha korridoreve dhe rrugëve të zhvillimit, ka ngelur si një fshat i harruar dhe këta nuk ndiejnë asnjë përgjegjësi për këtë gjë.

Ilva Tare– Sipas shqetësimeve që ka ngritur zoti Patozi dhe Partia Demokratike, ju akuzoheni se po zbatoni një skenar kriminal me njerëz të emëruar në polici dhe në institucione të tjera dhe me elementë kriminalë që bashkëpunojnë me kandidatin tuaj.

Ilir Meta– Për çdo element kriminal, ia kemi thënë dhe Patozit dhe Mediut, i cili ka shqetësime individuale dhe personale me Vorën, dhe i respektojmë ato shqetësimet personale, t’i çojnë në prokurori, ata nuk kanë guximin të na thonë emrat, se i çojmë ne, nuk ka asnjë problem. Prandaj unë ju ftova të shkoni atje dhe të shikoni. E gjithë kjo është një sajesë.

Ata quajnë terror faktin që qytetarët shkojnë denoncojë Fiqon, që u jep zarfe tek “Agro Blend”- i. Këtë quajnë terror ata, se çfarë terrori tjetër po ndodh aty?! “Dhe këto”, thonë, “i bën Ilir Meta.” Pse Ilir Meta? Ato administrohen, administrohet telefoni i kryeplakut, administrohet telefoni i tyre, administrohet kamera e “Agro Blend”-it, që deputetët e opozitës e bllokojnë, e kështu me radhë.

Pse Ilir Meta po u thotë “shpërndani miell për vota”? Ç’lidhje ka kjo me Ilir Metën? Në qoftë se ata kanë ndonjë të dhënë që kandidati i ASHE-së, i aleancës, bën këtë gjë, ta thonë, e denoncoj unë, le të mos e denoncojnë ata, se ata vetëm fjalë dhe shpifje dinë të bëjnë, ata nuk bëjnë veprime ligjore.

Ilva Tare –Në fakt, kandidatit nuk i është dëgjuar edhe shumë zëri, e kanë me ju, zoti Meta, emri juaj është përmendur në Vorë gjatë gjithë kohës, duket sikur e keni ju betejën me zotin Fiqiri Ismailin.

Ilir Meta –E kanë me mua se ata duan t’i japin rëndësi vetes. Përderisa e thotë Astriti që e di gjithë Shqipëria, dhe sa të shara marr unë me mesazhe në celular ditën e enjte, që e lë opozitën të flasë jashtë çdo limiti, dhe ai thotë…

Ilva Tare –Nuk e di për të sharat, por ligjin dhe Rregulloren e thyeni.

Ilir Meta –Po, por e bëj për të respektuar opozitën.

Ilva Tare –Në një vend demokratik nuk duhet ta bëni.

Ilir Meta –Jo, e bej për të respektuar opozitën.

Ilva Tare –Nuk ka respekt, ju nuk jeni mbi ligjin, zoti Meta.

Ilir Meta –Dakord, e pranoj këtë gabim.

Ilva Tare –Ky është gabim i rëndë.

Ilir Meta –Po, unë marr shumë të shara ditën e enjte nga qytetarët shqiptarë pse i lë ata të flasin më shumë sesa duhet, se këta edhe e shpërdorojnë dhe flasin në një mënyrë jo shumë etike.

Tani, ai thotë “më tha dikush mua që u fut një reklamë kur fole ti. Mos e ka bërë Ilir Meta”? Ai mund të vijë të flasë 10 orë ditën e enjte, nuk kam asnjë shqetësim unë.

Ilva Tare –Jo, 10 orë nuk ia lejon Rregullorja.

Ilir Meta –Dakord, por…

Ilva Tare –E qartë.

Ilir Meta –E kupton se në çfarë gjendjeje janë ata?

Ilva Tare –E kuptoj filozofinë tuaj.

Ilir Meta –Tani, pse merren me Ilir Metën ata? Ata merren me Ilir Metën se duan t’i japin rëndësi vetes, se po të merren me kandidatin, do të thonë njerëzit pse po merren me kandidatin, ndërsa Ilir Meta është një emër i njohur. Kjo është arsyeja.

Ilva Tare –Besoj se keni qenë i pranishëm në Vorë gjatë kësaj fushate.

Ilir Meta –Nuk është gjë fare kjo. Pas 21 qershorit do të vete dy herë në ditë.

Po çfarë faji kam unë, që këta kur iknin për në Rinas nuk ndalonin në Vorë? Përtonin të ndalonin. Këta vetëm tek “Agro Blend”-i ndalojnë, nuk shkojnë në zyrat e bashkisë, nuk shkojnë të takojnë popullin e Vorës, edhe pse kanë qenë të zgjedhur atje, absolutisht, nuk shkojnë t’i pyesin çfarë hallesh kanë këta njerëz. Pse nuk është bërë kjo rruga këtu? Pse nuk pastrohen këto kanalet kulluese, vaditëse?

Ilva Tare –Dakord.

Ilir Meta –Unë do të shkoj dy herë në ditë në Vorë pas 21 qershorit.

Ilva Tare –Do ta shikojmë këtë.

Ilir Meta –Po, patjetër.

Ilva Tare –Do ju monitorojmë.

Ilir Meta –Unë kam bërë një premtim solemn, që çdo qytetar i Vorës do të ketë një punë patjetër brenda dy vjetësh.

Ilva Tare –Zoti Meta, më lejoni, nuk ma thoni ju, në fakt, ma kërkon regjisori, duhet të shkojmë në reklama.

Ilir Meta –Patjetër.

Ilva Tare –Më pas kthehemi në pjesën e dytë të intervistës, të nderuar teleshikues.

Mos u largoni!

Ilir Meta –Patjetër.

Ilva Tare –Jemi rikthyer, zoti Meta. Ka shumë mesazhe, komunikime që po ju vijnë  edhe  juve, edhe mua. Një prej tyre është nga zoti Mediu që thotë: “Policia  që dhunon edhe pronën private,  në rastin e  hyrjes në “Agroblend” për të marrë kasetat dhe për të kontrolluar, është e shtetit, e ligjit apo e LSI-së?”

Ilir Meta–  Unë do ta  ftoja zotin Mediu t’i largohet qasjes personale, në  rastin e Vorës, se nuk  është mirë as për të. Policia është e shtetit dhe bëri detyrën  dhe duhet t’i ndjekë këmba-këmbës të gjithë ata që shpërndajnë zarfa me lekë, miell dhe  çdo gjë tjetër, për të blerë vota. Dakord?

Ilva Tare –Kjo është përgjigja?

Ilir Meta–  Patjetër,  kushdo qoftë, Fiqo apo ndonjë tjetër.

Ilva Tare –Të largohemi pak nga Vora, se është një debat, që mund të na marrë pjesën më të madhe të intervistës.

Ilir Meta–  Unë s’e kam problem.  Afër është Vora kështu që s’e kam problem.

Ilva Tare –  Po, do të shkoni atje 2 herë në ditë, pas zgjedhjeve.

Ilir Meta–  Po, pas 21 qershorit. Në bazë të  rezultatit të zgjedhjeve.

Ilva Tare –  Megjithatë,  me gjithë  ftesën tuaj duket sikur ka pak tension edhe pse janë  zgjedhje lokale dhe  s’janë zgjedhje  politike, nga të cilat do të varet karriera e partive politike.

Ilir Meta–  Tensionin e krijon opozita.

Ilva Tare –  A mund të jetë  kaq e njëanshme zoti Meta, që vetëm njëra palë krijon tension? 

Ilir Meta–  Po, patjetër,  çfarë  tensioni ka krijuar   LSI-ja apo  PS-ja?

Cili  është tensioni i krijuar? Ato janë deklarata kot, pa asnjë  lidhje me të vërtetën. Cili  është tensioni i krijuar? Thoni një gjë konkrete që ka ndodhur. Nuk ka ndodhur asnjë gjë konkrete, vetëm zhurmë, propagandë.

Ilva Tare –  Ka një  prani të madhe të  zyrave elektorale dhe të  flamujve të maxhorancës, veçanërisht të LSI-së në të gjithë  Shqipërinë. Kjo është zgjedhje juaja?

Ilir Meta–  Kjo është vende-vende dhe nuk është fare  zgjedhja ime, bile të them të drejtën, unë jam i pakënaqur, sepse nuk ndihmojnë fare  për votat, as flamujt, as  zyrat dhe asnjë gjë tjetër, por  duhet pasur parasysh që LSI-ja është një forcë shumë e madhe politike në të gjithë territorin e vendit dhe ne s’i ndalojmë dot  njerëzit të vendosin flamuj. I vetmi shqetësim që kam dëgjuar nga opozita, që  s’ka lidhje  me Kodin, edhe nga zoti Patozi në këtë rast, ishte  vendosja e fotografisë sime në një ambient privat, në Vorë, nga një ish-simpatizant i PD-së, i cili  e kishte vendosur më shumë për inat të kryetarit të bashkisë. Unë mora masa dhe e hoqa.

Ilva Tare –  Ai hezitoi ta hiqte, me gjithë kërkesën që i keni bërë ju?

Ilir Meta–  Po,  kam vajtur 2 herë  për ta hequr dhe ai më tha: “Unë mund të mbaj kë të dua këtu, Mesin apo ndonjë tjetër. Çfarë të duhet  ty?”

I thashë: “Të lutem, meqë ke mbajtur  mua, e kam problem se  kam dhënë fjalën në parlament që do ta heq fotografinë time nga Vora, meqë  mund të ketë shqetësime”.

Kjo s’është çështje ligjore, por është çështje etike. Unë nuk shqetësohem  kur shoh  fotografinë e Doktorit, që vazhdon të jetë në të gjithë Shqipërinë (se të  këtij të riut s’e mban njeri). Unë nuk shqetësohem, përkundrazi ndiej kënaqësi që  ka njerëz që e respektojnë.

Ilva Tare –  “Këtij të riut”,  e keni fjalën për zotin Basha?

Ilir Meta–  Po.

Ilva Tare –Meqë thatë, se ju s’i shtoni zjarr tensionit.

Ilir Meta–  Ky s’është tension. Pse, tension është ky? E kam fjalën për kryetarin e ri. Çfarë problemi ka? Shkëlqesisë  së tij zotit Lulzim Basha, për ta respektuar tamam.

Ilva Tare –Financimin e fushatës, zoti Meta, si e keni mbuluar? 

Ilir Meta–  Ai është një financim fare modest. Ju i keni parë, edhe spotet tona kanë qenë  mjaft të kufizuara. Edhe spoti i ri  që nxorëm, mori kohën e spotit të parë. Është një fushatë mjaft e qetë dhe mjaft  modeste.

Ilva Tare –  Nuk janë  vetëm spotet, po është edhe organizimi i aktiviteteve ku janë  kandidatët, kostoja për mitingjet.

Kostoja është shumë e papërfillshme.

Ilva Tare –  Dhe mbulohet nga  vetë partia?

Ilir Meta–  Po, nga partia, nga kandidatët  (një pjesë) dhe nga stafet e tyre. Çdo gjë do të bëhet transparente, sipas ligjit. Natyrisht,  është KQZ-ja që do t’i verifikojë ato.

Në vitin 2013, parulla e  LSI-së  ishte: “Të ecim më shpejt!” Tani e keni modifikuar  dhe  thoni: “Me qetësi dhe me dashuri”, por edhe: “Më shumë shërbime dhe punësim”. A  e ruani ende shpejtësinë apo keni ndërruar marsh?

Ilir Meta–  Çështjen e punësimit  e kemi pasur gjithmonë. Edhe kur thoshim: “Të ecim më shpejt!”, në këtë kuptim e kemi pasur. “Me qetësi dhe me dashuri”, është kryesisht për parlamentin dhe për  sjelljen politike, që duhet të jetë sa  më e qetë.  Ashtu siç ka qenë në përgjithësi sjellja  e LSI-së. Unë mendoj se kjo na rrit dhe i bën  qytetarët shqiptarë që ta vlerësojnë LSI-në. LSI-ja nuk është një parti që  i hedh benzinë zjarrit, por në të kundërtën, përpiqet t’i hedhë ujë zjarrit dhe përpiqet të vendosë logjikën  racionale në plan të parë.

Ju do të thoni se përsëri LSI-ja sulmohet. Po, sulmohet, sepse rritet. Tani ne s’mund të ndërpresim  procesin tonë të rritjes.

Ilva Tare –  Mendoj se sulmet janë për mënyrën sesi rritet.

Ilir Meta–  Mënyra është  shumë e qartë, shumë konstruktive dhe shumë transparente. LSI-ja rritet, sepse ajo bazohet te rinia dhe  mbi 70 % e votuesve të LSI-së janë  18 -35 vjeç. 

Kur të tjerët ikin me pushime të gjata, ne ikim çdo vit në Jalë  me qindra  të rinj, të cilët trajnohen. Janë  me mijëra e me mijëra të rinj, të cilët trajtojnë edhe fushatën tonë, të cilët udhëheqin edhe listat tona. Për kuriozitetin tuaj dhe të atyre që na ndjekin,  në 15 emrat e parë të  këshilltarëve për bashkinë e Tiranës, 10 janë të LRI-së.

Kush e ka rininë,  si LSI-ja? Askush.

Kush i ka studentët,  gjimnazistët,  si LSI-ja? Askush.

Kjo është mënyra më e shëndetshme,  më afatgjatë dhe më e mençur për t’u rritur. Të tjerat pastaj janë xhelozira, fjalë, spekulime.

Ilva Tare –Në vitin 2013, parulla e  LSI-së  ishte: “Të ecim më shpejt!” Tani keni ndërruar marsh apo jeni përsëri me të  njëjtin marsh?

Ilir Meta–  Ne jemi me marshin e  duhur dhe në drejtimin e duhur.

Ilva Tare –  Me marshin që kishit në 2013-n, morët 180 mijë  vota,  si  LSI. Po me këtë aktualin, sa e keni pritshmërinë?

Ilir Meta–  Ne  nuk jemi ndonjë shqetësim, nuk jemi në stresin e rezultatit dhe kjo na bën të  qetë dhe  konstruktivë. Ne e dimë, se  edhe sikur t’i fitojë  opozita të 61 bashkitë, s’do të ndodhë asnjë gjë  më 22 qershor. Me  rreth  30 deputetë që ka opozita, nuk arrin dot as të  firmosë një mocion mosbesimi  për Kryeministrin, jo më ta shkarkojë atë, sepse i duhen 71 vota. Për më shumë, siç u bënë  ndryshimet kushtetuese  në 2008-n, nuk ndryshon kurrë Kryeministri në këtë vend. A më kuptoni?

Ne jemi  shumë të qetë. Për ne  nuk ka asnjë rëndësi nëse i fiton PD-ja 61 bashkitë. Rëndësi për ne kanë  standardet.

Ilva Tare –Ka rëndësi  edhe për qytetarët shqiptarë

Ilir Meta– Ka rëndësi, por po them  se nuk është  kjo kryesorja.

Ilva Tare –  Sikundër ka rëndësi që të mos t’i fitoni edhe ju të 61 bashkitë, se do të cenohen balancat e demokracisë në këtë vend.

Ilir Meta–  Ilva, të lutem!

Po të them që nëse kanë mundësi t’i marrin, le t’i marrin. Kuptohet, me zgjedhje, me konkurrencë etj. Duke sharë, nuk të voton njeri. Ka ikur koha që votohej thjesht kundër në Shqipëri. Duhet të ketë një propozim …

Ilva Tare– Duhet të ketë edhe një frymë, pa diskutim.

Ilir Meta– Patjetër!

Ilva Tare– Për t’iu rikthyer edhe një herë sloganit: “Më shumë shërbime, më shumë punësim”, a mendoni se është pak e tepërt të premtosh punë, pas dy vjetësh që jeni në maxhorancë qeverisëse?

Ilir Meta– Patjetër, sepse ky është problemi kryesor. Lufta kundër varfërisë bazohet te rritja e punësimit, bazohet te rritja e ekonomisë, dhe natyrisht në shërbime, sepse kemi të bëjmë me shërbimet e pushtetit vendor, të cilat, falë një reforme historike, dhe mendoj se kjo është gjëja më e veçantë e 21 qershorit…

Ilva Tare– E pakompletuar ende.

Ilir Meta– … që do të hyjë në fuqi përfundimisht, dhe do të implementohen një reformë e jashtëzakonshme, që i jep fund një herë e përgjithmonë një keqorganizimi administrativ e territorial, që ishte një pengesë e madhe për të realizuar shërbimet e duhura dhe për të zhvilluar komunitetet në vendin tonë. Në këtë drejtim, mendoj se slogani ynë është një slogan shumë më i gjetur, që tregon prioritetet që do të ketë pushteti vendor. Deri tani, për shembull, pushteti vendor, edhe po të donte të kontribuonte për punësimin, nuk kontribuonte dot. Pse? Po marrim rastin e Lezhës, për shembull. Bashkia e Lezhës që ishte, ishte mjaft e tkurrur, një bashki mjaft e ngushtë. Për t’u bërë një fabrikë, kryetari i bashkisë nuk kishte mundësi, sepse do të bëhej në territorin e një komune ngjitur. Po kështu, për të bërë një qendër grumbullimi apo për të bërë një qendër përpunimi. Pra, ishte një gjë e pamundur. Ndërsa tani, mundësia është e shkëlqyer për të bërë politika zhvillimi, sepse ka një autoritet në të gjithë territorin e një bashkie të madhe, që ka shumë resurse, të cilat, të kombinuara, do të japin më shumë prodhim, do të japin më shumë përpunim, do të japin më shumë vende pune. Tani është një provë e madhe. A do t’i mbajmë ne të gjitha këto? Ndoshta mund të mos i mbajmë. Qytetarët do të na gjykojnë. Prandaj bëhen zgjedhjet. Bëhen zgjedhjet në 2017-ën, bëhen zgjedhjet në 2019-ën e kështu me radhë.

Ilva Tare– Ju me siguri jeni në presion të përditshëm nga qytetarë që duan të punësohen dhe vijnë në zyrat e LSI-së. Si e gjen LSI mekanizmin për të ofruar punësim?

Ilir Meta– Unë mendoj se LSI-ja është një forcë politike,e  cila e bazon gjithë fuqinë e vet në programin e saj. LSI-ja i ka mbajtur premtimet e saj. Ju thoni: pse vete në Vorë? Po ku të shkoj? Të shkoj në bashkinë e Skraparit? S’kam vajtur fare, dhe s’kam pse të shkoj, se unë premtimin…

Ilva Tare– S’keni pse e diskriminoni Skraparin.

Ilir Meta– Jo, jo, nuk e diskriminoj, se unë kam qenë përpara atje. Kam thënë edhe diçka tjetër para dy ditësh. Ata që na akuzojnë ne –  them – pse po rritemi, ata flenë gjumë katër vjet dhe kujtohen për njerëzit vetëm në fushatë, ndërsa ne, kur të tjerët e fillojnë fushatën, ne e kemi mbyllur atë.

Po marr rastin e Skraparit, se mund të shkoj atje më shumë se, po themi, në Vorë, apo jo? Atë premtim që kam bërë atje, që do të hapeshin dyqind vende të reja pune, e kam zgjidhur prej kohësh. Natyrisht, ajo u zgjidh përmes sektorit privat. Premtime të tilla kemi realizuar në shumë zona të Shqipërisë. Tani, me këtë pushtet të ri vendor, do të kemi mundësi akoma më tepër. Qofshin edhe kryetarë të Partisë Demokratike. Do të bashkëpunoj edhe me ata për të hapur vende të reja pune. Po më parë ishte e pamundur. Me 400 kryetarë bashkish e komunash, ishte e pamundur për të bërë…

Ilva Tare– Për të menaxhuar e për të qenë efikasë.

Ilir Meta–  …për të bërë diçka të mbarë, edhe për punësimin, edhe për investimin, edhe për menaxhimin e mbetjeve, për menaxhimin e kanaleve vaditëse, të kanaleve kulluese e të tjera e të tjera. ishte gjë e pamundur.

Ilva Tare– Meqenëse jemi te fushata, se dua ta mbyll këtë pjesë, meqë i prekëm disa komponentë të saj, diçka mbi gjuhën e përdorur në këtë fushatë. E juaja dihet prej vitesh tashmë, që është një shumë e moderuar, e zbutur, paqetore. Fjalimet e Kryeministrit Rama kanë qenë agresive veçanërisht ndaj kandidatëve të opozitës. Si e gjykoni këtë mënyrë, kur ai thotë: “Po mbledh budallenj, po mbledh të paaftë…”

Ilir Meta– Jo, nuk e shikoj ashtu. Pastaj, mos e shikoni në mënyrë të njëanshme. E para, njëherë, duhet të shohim gjuhën e zotit Basha. Ajo është gjuhë agresive. Zoti Rama thotë, sepse deri tani vetëm dy kandidatë kanë dalë deri tani, që do të bashkëpunojnë me Kryeministrin: zoti Kosova –  kanë treguar edhe qytetari, apo jo? Kanë treguar se vërtet kanë dalë për qytetin – dhe së fundi edhe zonja Dume në Durrës. Këta të dy. Të gjithë të tjerët pastaj, kanë dalë në linjën e partisë: “do të votoni për ne; do të ndryshojmë qeverinë; do të rrëzojmë qeverinë; do të shkurtojmë taksat; do heqim këtë; do të heqim atë”, gjëra që s’kanë lidhje fare me ta.

Ilva Tare– Mos u ndalni në fjalorin e opozitës. Ju pyeta për fjalorin e maxhorancës.

Ilir Meta– Mirë, pra, dakord! Tani kalojmë këtu.

Ilva Tare– “Do të bashkëpunoj me kandidatët e mi; me kandidatët tanë; se ata janë të mirët”.

Ilir Meta – Ai nuk ka thënë asnjëherë se nuk do të bashkëpunojë me kandidatët e opozitës. Përkundrazi, ka shprehur shqetësimin se asnjë nga ata nuk i ka kërkuar, në tetëmbëdhjetë muaj, që të bashkëpunojnë. I vetmi person, që i ka dërguar mesazhin, që unë s’dua t’ia them emrin…

Ilva Tare– Ju, e dini kush është? Sepse as zoti Rama nuk e ka zbuluar.

Ilir Meta– Sigurisht që e di.

Ilva Tare– Nuk do ma thoni në ekskluzivitet, për emisionin?

Ilir Meta– Nuk mund ta them, të lutem!

Pra, shqetësimi i zotit Rama është ky, që këta i duan zgjedhjet vendore thjesht për t’iu kundërvënë qeverisë, jo për t’i pasur në funksion të shërbimeve që duhet të ofrojnë për qytetarin, dhe për të rritur pakënaqësinë për qëllime politike për 2017-ën. Pra, kjo është. Këta nuk duan të bashkëpunojnë, jo se nuk do zoti Rama. Zoti Rama mezi pret të bashkëpunojë me të zgjedhurit e Partisë Demokratike, në rast se ata do të kthejnë mendje, dhe do të zgjidhen, kuptohet.

Ilva Tare– Pra, nuk e shikoni me shqetësim mënyrën se si u drejtohet kandidatëve të opozitës?

Ilir Meta– Ai e ka bërë shumë të qartë se është shumë i shqetësuar pse ata nuk kanë vajtur për të bashkëpunuar. I vetmi person që i kishte çuar një mesazh, donte të takoheshin fshehtazi. Fshehtazi s’mund të takohet Kryeministri me një kryetar bashkie. Dhe s’ka arsye që të takohen fshehtazi. Pra, përgjegjësinë për këtë e ka klima e rënduar dhe paragjykuese që krijon vetë opozita për raportet me qeverinë, edhe ndaj përfaqësuesve të saj të pushtetit vendor, kur dihet shumë mirë se duhet patjetër bashkëpunim midis një kryetari bashkie dhe një Kryeministri apo një qeverie, sepse qytetarët janë të përbashkët.

Ilva Tare– Opozita thotë se është përpara një maxhorance tiranike si kjo juaja, Rama-Meta.

Ilir Meta– Çfarë ka bërë kjo tirania e maxhorancës?

Ilva Tare– Duhet të takoheni me zotin Basha, që t’jua thotë në sy. Janë artikulime që i ka bërë, besoj, edhe në takime.

Ilir Meta– Zoti Rama e ka ftuar zotin Basha edhe për reformën administrative territoriale. E kërkoi në takim. I dhamë pesë variante, i dhamë gjysmën e komisionit, i dhamë bashkëkryetarin, i thamë na jep alternativë. Nuk dha asnjë lloj alternative. I kërkoi edhe takim, me shkrim, publikisht. Ai tha: “Jo, nuk viJ unë të takohem me ty”.

Si mund të ndodhin këto gjëra në demokraci? Atëherë, çfarë gjuhe bashkëpunimi ka këtu? Kujt t’ia kërkojmë? T’ia vëmë fajin zotit Rama, edhe për këtë gjë? S’ më duket bindëse.

Ilva Tare– Megjithatë, plumbi pa plumb, nuk shkon, besoj. Nuk i shkon Shqipërisë së 2015-ës.

Ilir Meta– Përkundrazi, vetëm qetësi e dashuri.

Ilva Tare– Ka një etje – nuk e di nëse ju e vini re – por ka një perceptim se ka një etje, ka një uri të maxhorancës për të fituar sa më shumë bashki,    mundësisht të 61-tat nëse do të mundet.

Ilir Meta– Unë sapo  u shpreha pak më parë që mirë nuk do të më vinte, por prapë nuk do të isha i tronditur nëse do t’i fitonte të 61 bashkitë PD-ja. Nuk ka asnjë gjë të keqe. Rëndësi ka që procesi të jetë i ndershëm, të jetë…

Ilva  Tare– Po nuk jeni i shqetësuar nëse i fiton maxhoranca këto.

 Ilir Meta– Nëse i fiton maxhoranca,  maxhoranca hyn në këto zgjedhje për të fituar,  se ne nuk tallemi me kandidatët, dhe t’i themi që ti që je këtu, do të fitosh dhe ti që je këtu, nuk do të fitosh. Ata mund të mos fitojnë asnjë, por  mund të fitojnë të gjithë. Tani kjo është në dorë të  popullit, të qytetarëve shqiptarë. Hajde të bashkëpunojmë me opozitën për standarde. Më të rëndësishmet janë standardet sesa rezultati, sepse, në fund të  fundit, janë zgjedhjet vendore. Ata thonë, jo, nuk janë zgjedhje vendore, por janë zgjedhje politike, do të heqim oligarkinë Rama-Meta, do të heqim taksat, dritat nuk do të paguhen më, do të bëjmë qejf, e të tjera, se boll me diktaturën e këtyre të dyve e të tjera. Tani çfarë të them unë, është mënyra se si e kanë ndërtuar të gjithë këtë fushatë që nuk shkon fare dhe kam përshtypjen që nuk përputhet fare me qytetarët.

Ilva  Tare–  Për ta mbyllur këtë pjesë të dytë, kanë mbetur…

 Ilir Meta– Vetëm dy kandidatë tani kanë dalë ndryshe nga linjat e PD-së, zoti Kosova dhe zonja Duma sot.

 Ilva Tare– Kanë mbetur edhe 5 ditë fushatë, duke ikur dita e sotme, deri në fund të procesit  të 21 qershorit, a druheni se procesi është dëmtuar nga këto akuza e kundërakuza për shitblerje të votës?

Ilir Meta– Asnjë  dëm nuk ka procesi. Këto gjëra duhet të hetohen, njerëzit duhet të dënohen,  kushdo që të jenë deri në fund. U bëj thirrje edhe një herë qytetarëve që të denoncojnë çdo fenomen të shitblerjes së votës. Të kenë kurajë për ta bërë këtë gjë dhe asnjë lloj shqetësimi nuk do të ketë për këtë çështje, mendoj unë, dhe të bashkëpunojë  me opozitën kudo rast pas rasti. Të shkojë zoti Patozi e të takohet me zotin Luan Rama në Vorë. Atje janë të dy, atje të takohen çfarë shqetësimi kanë, ta verifikojnë se kush janë banditët, kush janë të mirët, kush janë të këqijtë, kush është problem.  Problem? Çfarë problemi ka? Të bashkëpunojnë në Pogradec. Të shkojë ai e të takojë kandidaten tonë nëse ka ndonjë shqetësim. Ne jemi të hapur të bashkëpunojmë kudo. Nuk kemi asnjë shqetësim. Për ne rëndësi ka standardi i zgjedhjeve. Ata nuk e thonë këtë gjë. Për ata ka rëndësi referendumi kundër dyshes Rama – Meta.

Ilva Tare –Po për qytetarët shqiptarë..

 Ilir Meta – Se çfarë do të përfitojnë qytetarët më 22 qershor nga shërbimet e reja të pushtetit vendor kjo nuk ka shumë rëndësi.

 Ilva Tare –Për qytetarët shqiptarë ka rëndësi procesi dhe rezultati sigurisht,  por edhe procesi dhe çfarë rezultati do të dalë nga ato zgjedhje. Sa i pastër do të jetë, sa deformime do të ketë dhe nëse ka pasur probleme.

 Ilir Meta– Patjetër, por nuk  ka asnjë arsye që të paragjykojmë rezultatin. Besoj që fushata do të vazhdojë të jetë e qetë. Të heqim dorë nga shpifjet, t’u referohemi fakteve dhe të bashkëpunojmë në terren. Pra, të mos përpiqemi që një gjë lokale ta bëjmë problem kombëtar. Një problem që ndodh në Vaun e Dejës ta diskutojmë në Vaun e Dejës. Kandidati i aleancës sonë ta diskutojë me kandidatin e aleancës së tyre. Të jemi shumë të hapur për bashkëpunim.

Ilva Tare– Çfarë garancish jepini ju, zoti Meta, si kryetar i Lëvizjes Socialiste për Integrim, por  edhe si Kryetar i Kuvendit që nuk do të ketë probleme më 21 qershor apo derisa të mbërrijmë në ditën e procesit?

Ilir Meta– Asnjë problem nuk ka për të pasur dhe nuk ka pse të ketë. Përkundrazi. Nuk ka asnjë problem. Kjo është thjesht një përpjekje për të imponuar një klimë të paqenë. Poshtë situata është jashtëzakonisht e qetë.

Ilva Tare– Dhe nuk mendoni se do të ketë probleme pas zgjedhjeve? Ka një skenar që përflitet shpeshherë nën zë, por ka edhe artikulime të mundshme dhe në medie,  në debate publike se opozita mund të kontestojë rezultatin  që do të dalë nga zgjedhjet për shkak  të këtyre akuzave që ka bërë publike që tani gjatë fushatës.

Ilir Meta– Opozita ka një vit që thotë nuk hyjmë në zgjedhje. Është e drejtë e saj të bëjë zgjedhjen e saj.

Ilva Tare–  Jo, nuk e ka thënë asnjëherë publikisht që nuk do të hyjë në zgjedhje. 

Ilir Meta– E ka thënë me kohë. E ka thënë me kohë “nuk do ta njohim këtë reformë, nuk do të hyjmë në zgjedhje”.

Ilva Tare– Zoti Basha është shprehur edhe në këtë studio  që nuk bojkoton zgjedhjet.

Ilir Meta– Është e drejta e tyre edhe të bojkotojnë zgjedhjet, ashtu sikurse është detyrimi ynë të respektojmë standardet, të jemi të vërtetë dhe t’i referohemi gjithmonë ligjit. Është e drejtë e tyre të hedhin baltë për procesin, ashtu sikurse është gabim i madh i tyre që të pengojnë policinë për të marrë provat për zarfet që ndanin me lekë kandidatët. Është gabim shumë i madh të shkojnë deputetët e të pengojnë policinë  që të marrë provat. Është gabim shumë i madh kjo gjë. Ndërkohë, hedhin baltë e  shpifin. Unë nuk do ta bëja kurrë nëse do të kishte të dhëna që një kandidati i LSI-së bën këtë gjë apo kushdo qoftë. Përkundrazi do ta kisha bërë shembull. Por ata kështu bëjnë edhe me dekriminalizimin.

 E kam pyetjen për pjesën tjetër.

 Ilir Meta– Dakord.

 Ilva Tare– Publicitet.  

 

          (Spot publicitar.)

          Ilva Tare – Jemi rikthyer drejtpërsëdrejti.

          Të nderuara zonja e zotërinj, jam me zotin Meta, po flasim për zgjedhjet, klimën, fushatën, sigurisht edhe për pritshmëritë e Lëvizjes Socialiste për Integrim.

          Ka një tjetër zonë të nxehtë po e quaj unë, nuk e di si e konsideroni ju, ndoshta e keni më shumë të dashur sesa të nxehtë. E kam fjalën për Shkodrën. Jeni parë shpesh i angazhuar personalisht në krah të kandidates Bazhdari. Pse i gjithë ky angazhim në Shkodër?

          Ilir Meta – Angazhimi im me Shkodrën nuk është i vonshëm, është i hershëm.

Meqenëse edhe ju e keni këtë merak, mund t’ju them se jam krenar për të gjitha ato vepra të rëndësishme që kam bërë në një kohë të shkurtër kur kam qenë Kryeministër, që nga rruga Lezhë-Shkodër, që është një rrugë jashtëzakonisht e standardeve europiane do të thosha, ku pothuajse nuk ndodh asnjë aksident në raport me rrugën nga Fushë-Kruja deri në Lezhë; me rrugën e Velipojës që u bë në atë kohë, që tani ka ardhur koha të zëvendësohet me një superstradë të standardeve të reja, me rrugën e Muriqanit, spitalin e Shkodrës dhe shumë gjëra të tjera që lidhen me angazhimin tim, hapjen e konsullatës italiane në atë kohë në Shkodër e kështu me radhë.

          E përmenda rrugën Lezhë-Shkodër, sepse është vepra e parë më e madhe e bërë me fondet e buxhetit të shtetit, 4 miliardë lekë të rinj, dhe vazhdimisht kam qenë i angazhuar në Shkodër. Jam përpjekur edhe kur kam qenë në qeveri t’i garantoj përfaqësim sa më të madh shkodranëve në qeverisjen e vendit. Kështu që aktualisht jam angazhuar në Shkodër shumë normalisht në përkrahje të kandidates sonë të Aleancës për Shqipërinë Europiane dhe besoj shumë se Keti Bazhdari është drejtuesja e duhur për bashkinë e re të madhe të Shkodrës, sepse është administratore shumë e aftë. Nuk është figurë partiake në kuptimin e mirëfilltë të kësaj fjale…

Ilva Tare – Edhe pse ka një karrierë të vonshme në partitë që flisni.

Ilir Meta – Ajo është një njeri që vjen nga administrimi, vjen nga sipërmarrja. Çdo gjë e ka arritur vetë në jetën e saj, është një njeri e cila në aktivitetin e saj punëson rreth 800 veta, ndërkohë që në Bashkinë e Shkodrës janë të punësuar ndoshta më pak se 600 veta. Po e them këtë për faktin se nuk vjen njeri për të përfituar. Ka disa ëndrra për Bashkinë e Shkodrës, ka një model të sajin shumë pozitiv dhe po përpiqet të bashkojë sa më shumë energji pozitive shkodrane, jo thjesht të majtë apo të djathtë. Në këtë drejtim, unë mendoj që zgjedhja e saj do të ishte një mundësi e shkëlqyer për Shkodrën për të përfituar nga kjo reformë administrative territoriale në mënyrë maksimale, sepse bashkia e Shkodrës ka resurse të jashtëzakonshme. Kemi parasysh që shtrihet nga Velipoja deri në Theth, pra gjithë zonën e Nënshkodrës, zonë jashtëzakonisht me mundësi për zhvillimin e bujqësisë, të agropërpunimit, ka mundësi për të zhvilluar zonën industriale, mundësi për të lidhur Velipojën me Shëngjinin, mundësi për të lidhur Velipojën me Ulqinin, mundësi për të zhvilluar turizmin. Janë të jashtëzakonshme. Kështu që…

Ilva Tare – Kjo është arsyeja pse ju jeni i angazhuar dukshëm në Shkodër.

Ilir Meta – Arsyeja është se kam një dashuri të hershme me Shkodrën, nuk e kam të vonshme. Kam dëshirë t’i përkushtohem zhvillimit të mëtejshëm të Shkodrës dhe zgjedhja e Keti Bazhdarit do të ishte një mundësi e shkëlqyer. Jo se në rast se do të kemi një zgjedhje tjetër nuk do t’i japim mbështetjen e duhur, por jam i sigurt që…

Ilva Tare – Preferenca juaj do të ishte zonja Bazhdari.

Ilir Meta – Edhe ajo ofron bashkëpunim.

Ilva Tare – Nuk e di nëse e keni dëgjuar, mbrëmë në një televizion lokal ish-Kryetarja e Kuvendit, zonja Topalli, ka thënë se “në betejën time parlamentare nuk kam atakuar kurrë një femër, por kundërshtarja përballë Voltana Ademit në zgjedhjet vendore ka fytyrën e Ilir Metës dhe shkodranët do ta refuzojnë atë”. Pra, lë të kuptohet se është e mbështetur drejtpërsëdrejti nga ju.

Ilir Meta – Shiko, se çfarë vlerësimi kanë shkodranët për fytyrën e Ilir Metës apo për fytyrën e zonjës që është marrë me mua, këtë do t’ua lëmë shkodranëve që ta japin.

Së dyti, kjo me këto qëndrime që bën do të dëmtojë këtë Voltana Ademin, sepse jam i bindur që këtë gjuhë nuk e pranojnë qytetarët shkodranë.

Kam dëgjuar edhe zotin Berisha që ka shpifur për zonjën Bazhdari në parlament. Kjo tregon se ata po e përjetojnë shumë rëndë këtë sfidë qytetarie që zonja Bazhdari po bën në Shkodër.

Unë kam respekt për kandidaten e Partisë Demokratike dhe nuk ia lejoj vetes të them asnjë fjalë të papërshtatshme. Natyrisht, ajo ka qenë e detyruar të këndojë “Rama-Meta kanë maru, kanë maru”, por është e drejtë e saj. Unë përsëri vazhdoj ta respektoj, por ka ikur koha kur Shkodra votonte për partitë.

Shkodra këto mesazhe i ka dhënë edhe në të kaluarën. I ka dhënë edhe në vitin 1996 kur zgjodhi një figurë ndoshta edhe jo shumë të njohur, por si reagim ndaj përpjekjes së një partie për të imponuar një regjim partiak dhe, për fat të keq, Bashkia e Shkodrës është një bashki e karakterit partiak, që nuk ka të bëjë thjesht me personat që e kanë drejtuar, pra nuk janë ata që e imponojnë, por është kjo frymë urrejtjeje, ndasie e zonjës Topalli, të cilën shkodranët e kanë ndëshkuar me votë dhe nuk mund ta pranojnë.

Keti Bazhdari ka fytyrën e saj. Ajo nuk ka fytyrën e Ilir Metës, as fytyrën e Edi Ramës dhe të askujt tjetër. Ajo ka fytyrën e saj, të cilën e njohin të gjithë qytetarët shkodranë që çdo gjë e ka arritur falë punës së saj, falë studimeve të saj, falë përpjekjeve të saj dhe absolutisht që është një figurë që ka mundësi t’i japë jashtëzakonisht Shkodrës.

Nuk ka nevojë Shkodra për një figurë partiake që do të marrë urdhra nga partia. Ka nevojë për një figurë me vizion, që ka aftësi për të administruar, ka aftësi sipërmarrëse. E ka provuar vetë. Nuk vete atje për të bërë tenderë.

Ilva Tare – E kuptoj.

Për ta mbyllur me Shkodrën, keni sondazhe tuajat? Ne do ta publikojmë nesër një nga “Ipr Marketing” nga Ora News. Thuhet se diferenca e fillimit të fushatës është e madhe. Keni ndonjë sondazh që ka ndryshuar situata?

Ilir Meta – Unë mund t’ju them se jam gati të vij pas zgjedhjeve këtu bashkë me zotin Antonio Noto. Presidenti Ndroqi i di sondazhet e mia.

Sondazhi sidomos për Shkodrën ka qenë shumë i gabuar.  Nuk besoj se do të jetë shumë  i mirë edhe nesër, sepse i duhet shumë kohë për të marrë kthesën. E rëndësishme është që qytetarët e Shkodrës të votojnë për më shumë  shërbime dhe punësim për ta. Të mos votojnë për një konflikt politik midis baskisë dhe qeverisë.

Shpresoj që  edhe zonja Ademi, në ditët që vijnë, të distancohet nga kënga “Rama –Meta ka maru” dhe t’i bashkohet Halim Kosovës dhe  Grida Dumës, të dalë e të thotë që në qoftë se fiton, edhe ajo do të bashkëpunojë me  Kryeministrin Rama. Ky do të ishte një mesazh i mirë edhe nga ana e saj, si edhe një mesazh qytetarie dhe  çtensionim për  votuesit.

Ilva Tare– Për t’iu kthyer edhe sondazhit. Nëse nuk del parashikimi juaj, do të vini përsëri në studio me zotin Noto dhe Ndroqi t’u kërkoni ndjesë?

Ilir Meta– Unë vij në çdo kohë. Nuk kam asnjë shqetësim. Unë jam nga ata që kërkoj edhe ndjesë. Nuk kam thënë asnjëherë që  jam i pagabueshëm, por të jeni të sigurt që ata të pavendosurit që thotë Noto, që janë shumë, shumica e tyre janë të vendosur.

Ilva Tare– Dhe do të shkojnë për maxhorancën e majtë.

Ilir Meta –Do ta shikojmë. Jemi gati të vijmë këtu në studio pas zgjedhjeve, në respekt të transparencës së plotë për ju dhe të respektit për presidentin, zotin Ndroqi.

Ilva Tare– Meqenëse jemi te koalicioni, zoti Meta, si po shkon kohezioni midis PS-së dhe LSI-së?

Ilir meta– I shkëlqyer!

Ilva Tare– Në këtë aleancë të  dytë tuajën?

Ilir Meta– I shkëlqyer, i paparashikuar! Jo, për  raportet tona këtu në qendër, por për raportet në terren. Ka një shkrirje  të të dyja forcave politike. Atje  ku janë kandidatët e propozuar nga LSI-ja, strukturat e PS-së punojnë më fort. Atje ku janë propozuar nga PS-ja, strukturat e LSI-së punojnë më fort. Kështu që është një solidaritet i jashtëzakonshëm dhe një mirëkuptim i shkëlqyer.

Ilva Tare– Pra, mendoni që vota për koalicionin dhe vota për kandidatin nuk do të ketë diferencë shumë të madhe?

 Ilir Meta– Jo, absolutisht!

Ilva Tare– Siç ishte fillimisht rasti i Tiranës, nuk e di si do të dalë 21 qershori, apo i kandidatëve të tjerë?

Ilir Meta– Absolutisht, mendoj se do të jetë një votë shumë e  qartë dhe besoj se kandidatët do të marrin shumë më tepër vota sesa aleanca PS-LSI, sepse ne kemi shumë forca të tjera të rëndësishme  në koalicionin tonë, siç është PDIU-ja, Fryma e Re Demokratike, siç janë demokristianët, siç është Partia e Demokracisë Sociale dhe  shumë parti të tjera, që do t’u kërkoja falje, që nuk po i përmend. Janë gati 40 parti, por përmenda disa nga më kryesoret, që janë aktorë të rinj, të rëndësishëm dhe me peshë në  elektorat.

Ilva Tare– Dua t’ju pyes në fakt, pse  ky koalicion kaq i gjatë dhe i gjerë, por përpara se të shkojmë deri aty, rritja e LSI-së që ju  prisni apo rezultati i  kënaqshëm dhe i shkëlqyer, që ju thoni, që mund të ketë LSI-ja,  a mund t’ju sjellë probleme me  Partinë Socialiste?

Ilir Meta– Absolutisht, sepse jam i bindur që  edhe Partia Socialiste do të  ketë rritje, vetë  koalicioni PS-LSI do të ketë  rritje. E gjitha do të ketë rritje dhe nuk ka pse të ketë asnjë shqetësim.

Ilva Tare– Jo, mund t’ju vërë në pozitë, që të rishikoni, të  rivlerësoni edhe një herë kontratën që keni me njëri –tjetrin.

Ilir Meta– Jo, nuk ka asnjë arsye për ta rishikuar. Kontrata është bërë në bazë të  rezultateve të vitit 2013.

Ilva Tare– Dakord. Pse një koalicion kaq i gjerë në  zgjedhje, rreth 38 parti në fund? Madje edhe  me parti të  djathta, që ju i përmendet më parë?

Ilir Meta –Meqenëse e nisët me  sheshin e Lezhës, po kthehem edhe unë te Besëlidhja e Lezhës. Skënderbeu na ka mësuar: “Bashkimi bën fuqinë”!  Kështu që edhe ne duam të bëjmë një koalicion sa më të fuqishëm, jo  thjesht për të mundur opozitën, në rastin konkret Partinë Demokratike, por për të përballuar të gjitha sfidat e të ardhmes dhe besoj se kjo është në përputhje edhe me filozofinë tonë gjithëpërfshirëse si  Aleancë për Shqipërinë Europiane.

Ilva Tare– “Bashkimi bën fuqinë”, kur është brenda një vije të qartë ideologjike, por  jo kur janë pragmatiste?

Ilir Meta  – Janë zgjedhje vendore, janë zgjedhje për qytetarët dhe nuk shikoj ndonjë problem ideologjik.

Ilva Tare– Mendoni se do t’i mobilizoni edhe votat e djathta të  partive që keni për të votuar në favor  të koalicionit tuaj dhe  të kandidatëve?

Ilir Meta–  Patjetër, sepse ato janë parti serioze, të cilat po investojnë për të qenë  pjesë e një transformimi rrënjësor, që do të ndodhë në pushtetin vendor. Zgjedhjet e 21 qershorit janë zgjedhje historike. Shqipëria  do të jetë ndryshe pas këtyre zgjedhjeve dhe do të  jetë një Shqipëri shumë më funksionale, sepse  nuk e bëjmë thjesht me bashki, por kemi të bëjmë me zona ose njësi funksionale të zhvillimit  të vendit.

Ilva Tare– Përveç këtij bashkimi të madh që ju thatë “Bashkimi bën fuqinë”, bën  edhe një përçarje.

Ilir Meta– Na e  ka mësuar Skënderbeu!

Ilva Tare– Dakord.

Ilir Meta– Nuk duhet ta harrojmë historinë. E filluam me Lezhën, ta vazhdojmë me Lezhën.

Ilva Tare– Sigurisht. Megjithatë, zoti Gjinushi nuk është pjesë e  koalicionit. Madje, ai ka një kandidat të pavarur në Fier.

Ilir Meta– I urojmë suksese! Kemi shumë kandidatë të pavarur në këto zgjedhje dhe ky është një tregues i demokracisë.  Nuk është e lehtë të jesh një kandidat  i pavarur, por, në fund të fundit,  pjesëmarrja e tyre e bën  shumë më interesante garën dhe rezultati i tyre kudo në  Tiranë, në Fier, në të gjithë Shqipërinë, kudo që janë, sepse  ka shumë të pavarur, do të  lexohet me qetësi.

Ilva Tare– Ka edhe një zonë në Shqipëri, Kurbini, besoj se jeni në dijeni, që  KQZ-ja sot nuk ka pranuar ta regjistrojë zotin Biba të Partisë Demokratike, i cili  është dorëhequr dhe nuk do të marrë pjesë  në këto zgjedhje.

A mendoni se është normale  të bëhen zgjedhjet  aty vetëm me një  kandidat,  me kandidatin e maxhorancës në garë?

Ilir Meta– Natyrisht, nuk është  normale për një demokraci, nuk është normale për të shkelur ligjin apo kodin. Është një përgjegjësi që këto gjëra duhet të ishin parashikuar më mirë  në Kodin Zgjedhor. Nuk dua ta komentoj. E thashë edhe më përpara, edhe kur na pëlqenin, edhe  kur s’na pëlqenin vendimet e KQZ-së apo vendimet e  kolegjit, sepse ka vendime që na pëlqejnë dhe mendojmë se kishim të drejtë; ka vendime që nuk na pëlqejnë, sepse nuk vijnë sipas interesit tonë.  Kjo është gjëja më e lehtë, por  nuk i komentoj këto. Do të shikojmë  edhe vlerësimet e OSBE-ODIHR-it, si e trajton këtë rast apo rastin tjetër, siç është rasti i Këlcyrës. Në bazë të këtyre të reflektojnë  kodin që të mos kemi  fenomene të tilla në të ardhmen.

Ilva Tare– Dakord. A është sipas jush 21 qershori një test për punën që po bën maxhoranca  në këta 19 muaj, tashmë?

Ilir Meta– Për mendimin tim nuk është një test, sepse këto janë zgjedhje vendore. Megjithatë, unë mendoj se pavarësisht nga zgjedhjet, maxhoranca ka bërë një punë në përgjithësi mjaft të mirë, pozitive dhe është ende në fillimet e punës së saj.

          Ilva Tare – Punë të mirë në përgjithësi apo keni edhe vërejtje me ritmin, me mënyrën si po bëhen gjërat, reformat, selektivitetin?

          Ilir Meta –Janë bërë punë të mëdha, janë bërë punë të rëndësishme, kryepuna e deritanishme që fillon punën më 22 qershor është reforma administrative-territoriale, janë ndërmarrë edhe shumë reforma të tjera, të cilat janë në proces dhe do të japin impaktet e tyre pozitive në vitet që vijnë.

          Ilva Tare – Përflitet se do të ketë ndryshime në qeveri pas zgjedhjeve?

          Ilir Meta – Nuk kam ndonjë dijeni, por nuk do të ishte ndonjë çudi edhe të kishte e të mos kishte.

          Ilva Tare – Ju shquheni që herë pas here i jepni impuls qeverisë me ndryshimin e ministrave tuaj. Mund ta bëni këtë pas zgjedhjeve?

          Ilir Meta – Kjo çështja e ndryshimit në qeveri është një kompetencë që i takon kryesisht Kryeministrit, në rast se ai e gjykon këtë gjë, pse jo, kjo është një gjë që mund të bëhet.

          Ilva Tare – Dakord. A mendoni se do të ketë kosto në elektorat për reformat që përmendët pak më herët, që janë kryer tashmë, të tjerat që presin të përfundojnë dhe mund të ketë një rënie nga ato 1 milion vota që ju sollën në pushtet në vitin 2013?

          Ilir Meta – Nuk presim ndonjë rënie, por në çdo rast nuk i shohim si politike, këto zgjedhje si politike i shikon zoti Basha, ne nuk i kemi parë si politike, sepse nuk mendojmë që do të ndryshojë diçka më 22 qershor, do të jetë po ky parlament, do të jetë po kjo qeveri dhe do të jetë po kjo opozitë. Në krye të pushtetit vendor nuk do të kemi 400 kryetarë komunash dhe bashkish, por do të kemi 61. Cilët do të jenë këta do ta vendosin qytetarët shqiptarë, ne do të respektojmë zgjedhjen e tyre, do të bashkëpunojmë me të gjithë pa asnjë paragjykim.

          Ilva Tare – Pra, nuk janë aq të rëndësishme politikisht për ju sa po thoni që janë…

          Ilir Meta – Unë e kam thënë gjithmonë dhe i qëndroj konsekuent kësaj çështjeje, nuk janë fare të rëndësishme politikisht, për mua ka rëndësi standardi, nuk ka rëndësi rezultati.

          Ilva Tare – Më vijnë mesazhe shumë, jua bëra edhe pak në pjesën e parë, por ndoshta duhet t’jua riadresoj edhe një herë pyetjen….

Ilir Meta– Patjetër.

Ilva Tare– Për angazhimin e administratës, ishte edhe një nga vërejtjet e raportit sërish të ndërmjetëm të OSBE-ODIHR-it, angazhimin e administratës dhe të aseteve shtetërore në fushatë. Ministra të Partisë Socialiste, të Lëvizjes Socialiste për Integrim janë gjatë gjithë ditës në fushatë, thonë ata që denoncojnë përmes mesazheve, të paktën dhe kjo, së pari, është një shkelje ligji dhe, së dyti, thonë nuk e kemi luksin që ta kemi të gjithë qeverinë në fushatë elektorale pikërisht se janë zgjedhje lokale, në fund të fundit.

          Ilir Meta – Po, nuk e di këtë gjë, ndonëse kjo përbën një shkelje të ligjit që ministrat të shkojnë në fushatë. Unë mendoj që ne kemi parë gjëra serioze në të kaluarën, që nxirreshin me dhunë nxënësit e shkollave për të pritur kryeministra, Kryetarë parlamenti e kështu me radhë, aq më tepër kur këto gjëra vijnë edhe nga kryetari i Partisë Demokratike, që është edhe kryetari i bashkisë, që e kemi parë të gjithë nëpër televizione, te “Fiks Fare” e kudo sesi mbylleshin çerdhet në Tiranë, mbylleshin kopshtet që të dilnin edukatoret para parlamentit të protestonin “Meta ik” e ku di unë, e kështu me radhë. Më duket se çdo gjë është një teprim, është një ekzagjerim, dhe këto janë sebepe pastaj, nuk janë asgjë serioze.

          Ilva Tare – Nuk beson se do të jenë argumente apo justifikime për të cenuar standardin e zgjedhjeve?

          Ilir Meta – Nuk na qeshi Edi Rama, dhe, ngaqë nuk na qeshi Edi Rama, u prish standardi i zgjedhjeve. Këto janë histori kalamallëqe.

          Ilva Tare – Do të flasim pak për dekriminalizimin, por kur të kthehemi në pjesën e fundit pas publicitetit.

          Ilir Meta – Patjetër.

          Ilva Tare – Faleminderit!

 

publicitet

          Ilva Tare – Po diskutojmë për zgjedhjet, procesin, problematikën dhe një çështje që, në fakt, ka marrë kohë të mjaftueshme në debatin politik, zoti Meta, dekriminalizimin. Kjo është një çështje që ka mbështetje jo vetëm nga shqiptarët, por edhe nga ndërkombëtarët. Aty ku duket që ka më pak mbështetje është vetë klasa politike, e cila duket se e ka këtë problem. A mendoni se humbën një shans që në zgjedhjet e 21 qershorit klasa politike të tregonte shkëputjen nga elementë të ndryshëm, që mund të kenë pasur të kaluar kriminale?

          Ilir Meta – Unë nuk jam prokuror i Përgjithshëm që të kem informacionin e duhur, bazuar mbi fakte dhe prova për kandidatët. Dihet që ka pasur një përfshirje të partnerëve ndërkombëtarë në këtë çështje. Ata janë shprehur se një pjesë e kandidatëve me probleme janë evituar. Kjo ka qenë një gjë pozitive. Nuk mund të them sesi është integriteti i kandidatëve, sepse nuk kam asnjë provë apo asnjë fakt dhe nuk kam pasur ndonjë shqetësim të drejtpërdrejtë për ndonjë emër konkret.

          Ilva Tare – Për listat e LSI-së?

          Ilir Meta – As për listat e LSI-së, as për listat e askujt tjetër unë personalisht nuk kam pasur asnjë shqetësim të tillë.

          Ilva Tare – As për listat e maxhorancës, sepse flitet se janë disa kandidatë?

          Ilir Meta – Nuk e di, unë nuk kam pasur asnjë shqetësim, asnjë komunikim. Por ai qëndrim që unë kam mbajtur edhe me partnerët ndërkombëtarë, që e kam edhe publikisht, është që jemi të gatshëm të mbështesim çdo nismë, e cila, në mënyrë të qartë ligjore, vendos standarde më të larta, unë preferoj ta quaj dekriminalizim, për integritetin e përfaqësuesve publikë, të zgjedhur apo të emëruar. Nëse kjo do të kërkonte edhe ndryshime kushtetuese, sepse me sa duket ka probleme me të drejtat kushtetuese, unë mendoj se edhe ndryshimet kushtetuese mund të bëhen për këtë gjë. Meqenëse është bërë një shqetësim serioz, atëherë jemi të detyruar të marrim disa masa jo të zakonshme për të goditur këtë fenomen dhe për të rritur standardin e  zgjedhjes dhe të përfaqësimit në jetën publike, por në mënyrë ligjore. Po të vazhdojmë me teoritë e PD-së, që kur i intereson thotë se ky duhet hequr dhe kur nuk i intereson thotë e ky është dënuar për arsye politike, nuk shkon. Të caktosh një njeri që është dënuar nga gjykata kandidat do të thotë se ti nuk je për dekriminalizimin, as për të luftuar korrupsionin, as për të luftuar shkeljen e ligjit, por këtë e ke për propagandë, për qëllime politike.      

          Ilva Tare – Nëse ai ka qenë realisht i dënuar, e ka kryer dënimin dhe mund të hyjë në jetën politike. Si do ta quajmë në këtë rast?

Ilir Meta– Të provohet dhe duhet të qartësohet çdo gjë në ligj. në lidhje me rastin e Kurbinit, që thoni ju, a është normale që të zhvillohen zgjedhje me një kandidat, kur tjetri praktikisht është tërhequr, pavarësisht se e ka emrin. Ligji është i tillë dhe Kolegji dhe KQZ-ja nuk kanë çfarë të bëjnë, duhet parë ligji. Edhe në këtë rast ju mund të keni të drejtë për këtë gjë, por legjislacioni shqiptar nuk e pengon sot me ligj, atëherë duhet bërë një ligj. Ndoshta ligjin e pengon Kushtetuta, atëherë duhen bërë edhe ndërhyrje në Kushtetutë.

Ilva Tare –Pra, ju nuk jeni kundër dekriminalizimit?

          Ilir Meta – Si kundër? Ne jemi për dekriminalizim total. Hajde ta bëjmë me ligj, jo me llafe e propagandë. Nëse thua për dikë se ky është ndaluar nga policia, po themi kot për një person, sepse këto muhabete po dëgjojmë: hajde verifikoje, sepse janë ndaluar edhe deputetë, në Milano etj. Policia dyshon dhe të ndalon: nuk ka asgjë të keqe. Ndërsa ti vendos kandidat për kryetar bashkie dikë që është dënuar nga gjykata për korrupsion, duke e sfiduar dhe duke thënë se është politike. Kur dënohet një deputet i PS-së nga gjykata, ajo është e ndershme dhe tregoi se kemi të drejtë. Kur dënohet një përfaqësues i PD-së, gjykata është politike. Kjo nuk shkon.  Dekriminalizimi nuk bëhet me standarde të dyfishta. 

          Ilva Tare – A mund të vendoset një standard moral mes liderëve të politikës që të mos vendosin emra të tillë? Kaq të nevojshëm i ka politika kandidatët që kanë probleme? Nuk mund të gjeni të tjerë?

          Ilir Meta – E nderuar Ilva, jam shumë dakord për këtë gjë, por këtu është e vështirë për t’u vendosur standard moral, përderisa jemi në këtë situatë që jemi. Për mua, morali fillon nga ligji. Hajde të vendosim standard ligjor! Kur të vendosim standardin ligjor, e kemi vendosur edhe standardin moral. Morali mbetet gjithnjë një çështje subjektive. Unë jam i moralshëm, ti je i pamoralshëm: përralla të tilla.  Kështu funksionon shteti i së drejtës: të propozojë një paketë PD-ja, PS-ja apo partnerët ndërkombëtarë dhe ta miratojmë. Bëjmë edhe ndryshime në Kushtetutë. Të bëjmë ndryshime në Kod dhe kudo: pa asnjë problem. Dhe kemi kohë, sepse kemi zgjedhjet e vitit 2017.

          Ilva Tare – Thashë se mos e konsideroni 21 qershorin një shans të humbur.

          Ilir Meta – Ishte një mundësi e mirë, por ndoshta ishte koha e shkurtër dhe instrumentalizimi politik i dekriminalizimit ishte i madh. U duk se u arrit një marrëveshje një ditë para se të skadonte afati i regjistrimit të kandidatëve. Nëse mbani mend, zoti Balla dha një përgjigje për propozimet e PD-së. Ata nuk pranuan.

          Ilva Tare – Sepse ishte ndryshe nga propozimi që kishin bërë ata.

          Ilir Meta – Nuk ishte ndryshe: ishte 80% e njëjta gjë. Ishte një propozim pothuajse ligjor, megjithëse kishte edhe probleme ligjore: thjesht, për të treguar vullnetin politik. Është e qartë se do të duhen ndoshta ndryshime edhe në Kushtetutë për të bërë këtë proces për të cilin po flitet. Ne jemi të hapur të bëjmë çdo gjë. Të marrim edhe vendimin e Komisionit të Venecias, siç kemi rënë dakord. Të bëhet diçka e pastër ligjore, përndryshe do të kthehet në propagandë.

          Ilva Tare– E qartë. Meqë po flasim për diçka ligjore, dhe përmendët edhe Komisionin e Venecias, një reformë e rëndësishme është edhe reforma në drejtësi. Ka pothuajse dy vjet që maxhoranca nuk po ecën dot përpara, edhe për shkak se, sipas pretendimit të maxhorancës, është opozita ajo që po e mban peng ecurinë e kësaj reforme. Duke qenë se ministri i Drejtësisë është i LSI-së, a mbani përgjegjësi në këtë situatë të bllokuar për drejtësinë?

          Ilir Meta– Nuk mbajmë asnjë përgjegjësi në këtë drejtim që bëni pyetjen, sepse problemi i drejtësisë nuk është as problem i Ministrisë së Drejtësisë, as i qeverisë, as i maxhorancës. .