Ish-deputetja e LSI, Silva Caka: Venecia çjerr maskën e anti-shtetit të Ramës

Ish-deputetja e LSI, Silva Caka, reagon pas raportit të Komisionit të Venecias, që i dha të drejtë Presidentit Ilir Meta për emërimet në Gjykatën Kushtetuese, duke u shprehur se “Venecia bëri shkrumb e hi paçavuren që synonte të ndryshonte procedurën e betimit të anëtarëve”.

Sipas ish-deputetes, pas këtij rapoti të Venecias SPAK duhet të bëjë një hetim të thelluar, pasi asgjë nuk e justifikon më Ardian Dvoranin.

Reagimi i plotë i Silva Cakës:

Venecia çjerr maskën e antishtetit të Ramës!

Më një opinion shumë të qartë e të lexueshëm për të gjithë shqiptarët, si për ata që nuk dinë anglisht, ashtu edhe për ata që nuk janë juristë, Komisioni i Venecias, shpartalloi gjithë paligjshmërinë dhe propagandën e ngritur nga Rilindja, duke konfirmuar edhe një herë se qëllimi i vetëm i kësaj maxhorance qeverisëse, Parlamentit ilegjitim dhe buratinëve të tyre në KED, ishte kapja politike e Gjykatës Kushtetuese.

Komisioni i Venecias bëri shkrumb e hi paçavuren që synonte të ndryshonte procedurën e betimit të anëtarëve të Gjykatës Kushtetuese, bëri shkrumb e hi votimin e paligjshëm të Arta Vorpsit në Parlament, bëri shkrumb e hi veprimtarinë e komisionit qesharak që do të hetonte dhe do të shkarkonte Presidentin, si dhe nxorri cullak veprimtarinë e paligjshme dhe të dyshimtë të Ardian Dvoranit.

Për këtë të fundit, opinioni i Komisionit të Venezias, duhet t’i hapë rrugën SPAK-ut për një hetim të thelluar. Asgjë nuk e justifikon më Ardian Dvoranin!

Gjithë manovrat e tjera kundër Presidencës, bëhen letër higjienike, madje edhe duartrokitjet e disa ndërkombëtarëve, të cilët u ekzaltuan tej mase kur Parlamenti ilegjitim, ”zgjodhi” Arta Vorpsin si anëtare të Gjykatës Kushtetuese.

Asgjë nuk e justifikon më qëndrimin e kësaj maxhorance në pushtet, as Taulanti, I cili përpiqet t’i hedhë gjalp asaj marmalatës që vetë e gatuan, e vetë po e hanë tani.

Shuplakat e njëpasnjëshme që po vijnë nga institucione ndërkombëtare, janë prova e qartë e neverise për Edi Ramën e dëshirat e tij të shfrenuara për pushtet dhe kjo nuk është më kombëtare; ajo i ka kaluar kufijtë tanë, e këto janë sinjale të pastra për shqiptarët, të cilët duhet t’a ndalojnë me çdo formë këtë shkatërrim të vendit dhe shtetit.