Ish-zv.ministri i Shëndetësisë lë paraburgimin dhe dëshmon në Komisionin e Sterilizimit

Ish-zëvendësministri i Shëndetësisë, Klodian Rrjepaj ka lënë paraditen e sotme paraburgimin për të dëshmuar në Komisionin e Sterilizimit.

Prokuroria e Posaçme i dha leje që Rrepaj të lërë qelinë e paraburgimit dhe të paraqitet fizikisht në komision. Kjo është hera e parë që një i paraburgosur merret në pyetje nga deputetët.

“Mendoj se të thuash po hetojmë projektin e sterilizimit nuk është e drejtë. Është në kurriz të gjithë aktiviteteve të tjera që kryhen brenda këtij projekti.

Do të ishte mire që kur themi sterilizimi të kuptojmë një projekt që ka objektin e vet, ofrimin e setit të instrumenteve, ofrimin e veshjeve një-përdorimshe për personelin mjekësor, dezinfektimin e sallave, trajtimin e mbetjeve me risk biologjik si dhe administrimin e repartit qendror të sterilizimit. Janë këto elementë që përmbajnë projektin që nuk është vetëm sterilizimi. Sterilizimi është vetëm një nën komponente e komponentes së ripërshatjes dhe riintegrimit të instrumenteve kirurgjikale”, ka thënë Rrjepaj.

Po ashtu, do merren në pyetje edhe dy prej anëtarëve të komisionit që shpalli fituesin e koncesionit, Marsela Serjani dhe Petro Mersini. Të dy janë në masë detyrim paraqitjeje, por edhe për ta SPAK ka dhënë leje që të pyeten nga Komisioni.

Ndërsa ish-ministri i Shëndetësisë, Ilir Beqaj do të dëshmojë më 3 tetor.