”JO” e negociatave, Pendarovski: Ballkani nuk duhet të mbesë një rajon i harruar

Gjatë një konference të përbashkët me Kreun e Shtetit, Ilir Meta, Presidenti i Maqedonisë së Veriut, Stevo Pendarovski, thotë se vendi i tij nuk është penalizuar nga Shqipëria për ”JO-në” e negociatave. Ai thekson se të dy vendet kanë përparuar njësoj dhe meritonin të merrnin dritën jeshile për këtë hap. Për të tepër, Presidenti i Maqedonisë së Veriut, tha se vendimi është një ndëshkim i pamerituar për të gjithë rajonin.

“Procesi i ndarjes së dy shteteve, asnjëherë nuk ka qenë pjesë e fjalorit tim politik, sepse mendoj se dy shtetet duhet t’i fillonin negociatat. Ne harxhuam shumë kohë tek miqtë tanë t’i bindim se nuk bëhet fjalë për anëtarësim të plotë, por vetëm fillim të një procesi që do të vijojë me vite të tëra. Serbia është në vitin e pestë të negociatave, Mali i Zi është në negociata shtatë vite e gjysëm, e nga ky vit nuk i ka hapur ato kapituj jo më t’i mbyllë. Kjo është mënyra më e mirë për bërjen e reformave. Një Gjermani dhe Francë që ka arritur për 200-300 vite, ne duam ta bëjmë për shumë më shpejt. Këtë radhë nuk na u mundësua. Ky është një ndëshkim i pamerituar për të gjithë rajonin. Rajoni nuk duhet të jetë i harruar. BE duhet të gjejë forma dhe mënyra të afrojë edhe Bosnje-Hercegovinën me Evropën”, tha Pendarovski.