Jorida Tabaku dëshmon në SPAK: Denoncova grupin kriminal të inceneratorëve

Deputetja e PD-së, Jorida Tabaku, ka dëshmuar ditën e sotme për rreth tre orë para prokurorëve të Prokurorisë së Posaçme (SPAK) lidhur me çështjen e inceneratorëve.

Në një prononcim para mediave, në dalje nga SPAK, Tabaku tha se ka denoncuar “grupin kriminal të inceneratorëve”, siç u shpreh ajo.

“Unë që në 2018 kam denoncuar aferën e inceneratorëve në emër të PD. Kemi sjellë 3 kallëzime, për inceneratorin e Tiranës, Fierit dhe të Elbasanit. Solla 9 kallëzime të tjera. I pari ishte për raportin e komisionit hetimor dhe 8 të tjerët ishin për individë që gjykojmë për aferën e inceneratorëve. Janë 500 të akuzuar që kanë dalë në këtë komision dhe mbi 150 fakte ose grup fakte që ia kemi vendosur SPAK në dispozicion.

Sot isha për çështjen e inceneratorit të Fierit dhe të Tiranës. Informova për zhvillimet e komisionit hetimor, për sqarime dhe faktet, që lidheshin për dëshmitë dhe materialet që kemi mbledhur gjatë punës pranë komisionit dhe me komunikimet që kam pasur.

Kam qenë në komunikim të vazhdueshëm me SPAK sa i përket hetimeve, duke kërkuar informacion se në çfarë ndodhen hetime, por dhe në statusin e personit që denoncova. Sot kam qenë në cilësinë e kallëzueset për Inceneratorin e Tiranës dhe të Fierit. Kam një listë dëshirash se kush duhet të vijë në SPAK. Sot s’i mora ata në pyetje, më kërkuan informacion. Shumë shpejt do të kemi të reja në fazën që ndodhen hetimet. Hetimi i aferës ka qenë një prioritet jo vetëm i punës time, por dhe hetimet kanë ecur në organin e akuzës”, tha Tabaku.