Kadilli: Berisha është politikani më i zoti në 100 vjet, por ka dy defekte të mëdha

Si e lexon rikthimin dhe gjuhën që po përdor Sali Berisha, ish-kandidati për kryetar të PD-së, Fatbardh Kadilli?

“Një nga gjërat që unë kam pas distancë gjithmonë me Berishën, që kur ishte president dhe unë këshilltar, është gjuha e ashpër e qëllimtë, për të trimëruar detashmentin e tij, dhe për të ngjallur urrejtje. E djathta nuk urren, e djathta bashkon”. Ai shton edhe diçka tjetër, duke marrë shembuj ndër vite, edhe pse pohon se Berisha ka qenë politikani më i zoti shqiptar në 100 vjet.

“E dyta, mungesa e konsekuencës. Ish- komunisti fanatik, u bë antikomunist fanatik. Shumë mirë. Në 1994 ishte fanolisti që përzuri Lekën e I-rë, në 1997 ishte zogisti i thekur që i jepte Lekës të gjithë aksesin për të rimarrë mbretërinë.

U bë liberali më ekstrem, duke i thënë Ramës se nuk kishte bërë asgjë për martesat gay, reaguam unë dhe Tritan Shehu. Ishte kampioni i liberalizmit, tani bën konservatorin.

E quajti llum i kombit Nanon, një vit e gjysmë me pas donte ta bënte president. E quajti Lulzim Brava ish-liderin e PD-së, sot e quan sërish Basha. Kjo është mungesë e vazhduar mosrespekti për fjalën që thua, dhe nuk ka njeri që nuk e kupton.

Mund të ndryshosh qëndrim, por duhet të ketë një arsye të fortë. Çfarë e bëri Fatos Nanon nga një nga personat më të korruptuar në Ballkan në një kandidat për president, çfarë ndryshoi te Basha që iku?”, tha në “A2cnn”.