Kaosi në Kuvend, deputeti Baçi: Rama ka frikë përballjen me Berishën

Përjashtimi i Sali Berishës me 10 ditë nga punimet e Kuvendit, për deputetin e Partisë Demokratike, Luan Baçi, tregon se se kryeministri Edi Rama ka frikë të përballet me kryedemokratin.

Sipas tij, Berisha ka të drejtë të kërkojë interpelancë me Ramën dhe shtoi se fakti që është i sanksionuar nga SHBA-të, nuk duhet të bëhet pengesë.

“Këto penalitete, do dhe i keqpërdor mazhoranca. Kërkon që të gjithë deputetët e tjerë t’i bëjnë një përjashtim “de facto”, duke mos e vënë sikur nuk ekziston. Është e drejta e tij si deputet, nuk ia heq askush këtë. Është me rregullore. Rregullorja nuk parashikon që po ishte një deputet “non grata”, unë të heq të drejtën e interpelancës. Ka frikë të përballet me Sali Berishën. Kanë frikë të përballen me Sali Berishën. Sali Berisha e thotë atë që është, ashtu siç është. Ka frikë dhe e shmang”, theksoi ai për ”Euronews Albania”.