Kartolina e kryeministrit Rama për festat e fundvitit: Nën këtë qiell ka një kohë për gjithçka

Këtë vit për festat e fundvitit, kryeministri Edi Rama ka zgjedhur një urim më të gjatë se zakonisht për shqiptarët. Kartolina e kreut të qeverisë, e vë theksin tek mesazhet që përçojnë për të vijuar jetën në një kohë me luftë dhe sfida. Kartolina e Ramës tregon dy anët e jetës.

“Nën këtë qiell ka një kohë për gjithçka dhe ka një stinë për çdo veprim: Një kohë për të lindur e një kohë për të vdekur, një kohë për të mbjellë e një kohë për të shkulur, një kohë për të vrarë e një kohë për të shëruar, një kohë për të shembur e një kohë për të ndërtuar, një kohë për të vajtuar e një kohë për të qeshur.

Një kohë për të mbajtur zi e një kohë për të hedhur valle, një kohë për t’i hedhur e një kohë për t’i mbledhur gurët, një kohë për të përqafuar e një kohë për t’u rezervuar në përqafime, një kohë për të këmbëngulur e një kohë për të hequr dorë, një kohë për të mbajtur e një kohë për të flakur.

Një kohë për të prishur e një kohë për të ndrequr, një kohë për të heshtur e një kohë për të folur, një kohë për të dashur e një kohë për të urryer, një kohë për luftë e një kohë për paqe. Qoftë Viti i Ri një kohë për paqe, për dashuri e për plot të qeshura për ju, familjen dhe miqtë e të afërmit tuaj”, shkruhet në urimin e kryeministrit Edi Rama.