KLD, kreu i Kuvendit: Do ta shqyrtojmë me vëmendje vendimin e Kushtetueses

Kryetari i Kuvendit, Ilir Meta tha sot se parlamenti do ta shqyrtojë me shumë qetësi dhe vëmendje, vendimin e Gjykatës Kushtetuese, e cila një ditë më parë pranoi pjesërisht kërkesën e Partisë Demokratike për shpalljen në papajtueshmëri me Kushtetutën të nenit 4 të ligjit për Këshillin e Lartë të Drejtësisë.

“Do ta shohim me shumë qetësi dhe vëmendje çdo akt të zbardhur të Gjykatës Kushtetuese  kur ai të vijë tek ne. Kuvendi do e shohë me vëmendje dhe respektin maksimal dhe është Kuvendi ai që do të vendosë”, iu përgjigj Meta interesimit të gazetarëve, pas një konferencë mbi të drejtën e informimit.

Një ditë më parë Kushtetuesja pranoi pjesërisht kërkesën e PD-së për shpalljen si të papajtueshëm me Kushtetutën të nenit 4 të ligjit për Këshillin e Lartë të Drejtësisë, ndërsa rrëzoi kërkesën e Presidentit të Republikës për shfuqizimin e nenit 7 të po këtij ligji.

PD kërkoi shpalljen të papajtueshëm të nenit që kushtëzon se anëtarët e KLD-së të zgjedhur nga Konferenca Gjyqësore duhet të kenë një përvojë pune në profesion jo më pak se 10 vjet, ndërsa anëtarët që zgjidhen nga Kuvendi duhet të jenë juristë e jo gjyqtarë me një përvojë pune prej të paktën 15 vitesh në profesion