KLP: Të nisë hetimi për prokurorin Arjan Ndoji
Këshilli i Lartë i Prokurorisë (KLP) ka kërkuar sot nga Prokuroria e Përgjithshme nisjen e hetimit për Ardian Ndoji, prokurori që u plagos më 1 nëntor në Durrës. Duke dënuar aktin e plagosjes së një zyrtari të lartë, KLP thotë se nga deklarimet që prokurori ka dhënë për mediat rezulton se veç funksionit shtetëror, ai kryente aktivitet privat si konsulent ligjor. Një fakt i tillë tregon për konflikt interesi të Ardian Ndojit. Një ditë ma parë, në media dolën fakte se në makinën e Ndojit kishte dosje hetimore dhe dokumente të prokurorisë, mbajtja e të cilave jashtë ambienteve shtetërore përben shkelje.
“Nisur nga të dhëna paraprake si dhe nga një prononcim dhëne për median A2 News nga prokurori Ndoji, bëhet me dije fakti që prokurori drejton prej kohësh një studio ligjore ku ofron konsulencë ligjore për cështje të ndryshme. Ky fakt nëse do të rezultonte i vërtetë, do të përbënte shkelje disiplinore”- shkruhet në letrën që mban firmën e Gent Ibrahimit, kreut të KLP-së.
Në fund, Këshilli i Lartë i Prokurorisë, bazuar në nenin 119 të ligjin 96/2016 “Për statusin e gjyqtarëve dhe prokurorëve në Republikën e Shqipërisë”, i kerkon kryeprokurores, “nisjen e një hetimi disiplinor ndaj prokurorit Arjan Ndoji, duke gjykuar nëse janë konsumuar apo jo prej tij shkeljet disiplinore të parashikuara nenin 103 pika a dhe ç, të ligjit 96/2016 “Për statusin e gjyqtarëve dhe prokurorëve në Republikën e Shqipërisë”.
LETRA E PLOTE
Këshilli i Lartë i Prokurorisë
Tiranë me datë 6.11.2019
Lënda: Kërkesë për nisjen e hetimit disiplinor
PROKURORIT TË PËRGJITHSHËM
T I R A N Ë
E nderuar znj. Marku,
Ngjarja e ndodhur në datën 01.11.2019, në mbikalimin e Shkozetit, ku u qëllua me armë zjarri ndaj makinës së prokurorit Arjan Ndoji, dhe si rezultat i atentatit mbetën të plagosur, prokurori Arjan Ndoji, shoferi i tij, Andi Maloku si dhe një person tjetër i identifikuar me emrin Aleksandër Laho, është një ngjarje e rëndë në rradhët e magjistratëve si dhe të sistemit të drejtësisë në vend.
Nisur nga të dhëna paraprake si dhe nga një prononcim dhëne për median A2 News nga prokurori Ndoji, bëhet me dije fakti që prokurori drejton prej kohësh një studio ligjore ku ofron konsulencë ligjore për cështje të ndryshme. Ky fakt nëse do të rezultonte i vërtetë, do të përbënte shkelje disiplinore të parashikuara në nenin 103 pika a dhe ç, të ligjit 96/2016 “Për statusin e gjyqtarëve dhe prokurorëve në Republikën e Shqipërisë”.
Neni 160/5 i Ligjit 96/2016“Për statusin e gjyqtarëve dhe prokurorëve në Republikën e Shqipërisë” si dhe nenit 194/2 gërma ç, i Ligjit 115/2016“Për organet e qeverisjes së sistemit të drejtësisë”, ngarkojnë Prokurorin e Përgjithshëm me detyrën qe të hetojë të gjitha pretendimet për shkeljet disiplinore në rradhët e prokurorëve për sa kohë nuk është krijuar Inspektoriati i Lartë i Drejtësisë.
Sa më lartë, Këshilli i Lartë i Prokurorisë, bazuar në nenin 119 të ligjin 96/2016 “Për statusin e gjyqtarëve dhe prokurorëve në Republikën e Shqipërisë”, kërkon nga ana Juaj, nisjen e një hetimi disiplinor ndaj prokurorit Arjan Ndoji, duke gjykuar nëse janë konsumuar apo jo prej tij shkeljet disiplinore të parashikuara nenin 103 pika a dhe ç, të ligjit 96/2016 “Për statusin e gjyqtarëve dhe prokurorëve në Republikën e Shqipërisë”.
Mbetemi ne pritje te gjetjeve dhe propozimeve Tuaja.
Duke Ju falenderuar për bashkëpunimin,
KRYETARI, GENT IBRAHIMI
