Koço Kokëdhima: Koalicioni Rama-Meta nuk ka probleme

Prej muajsh Partia Socialiste është në proces të brendshëm zgjedhor, por kongresi i planifikuar për në janar u shty në mars.

Për Koço Kokëdhimën, i cili ka qenë i pari që ka kërkuar shtyrjen e kongresit, nuk është problem data se kur ai mbahet, nëse do të ketë një reformim cilësor të PS-së.

“Nuk është thelbësore nëse bëhet kongresi këtë muaj apo muajin tjetër. Me rëndësi të madhe janë proceset politike që zhvillohen, edhe vëmendja jonë është e përqendruar në këto procese politike”, tha ai në një prononcim për mediat në një takim në Vlorë

Aq e rëndësishme është reforma brenda socialistëve sipas Kokëdhimës, pasi do të ndikojë direkt në përmirësimin e qeverisjes së vendit në sektor të ndryshëm.

“Nuk kemi në parti probleme me njëri-tjetrin, që jo po doli fjala ime, jo po doli fjala jote. Tek ne egziston një debat tjetër, debati si të përmirësojmë cilësinë e qeverisjes, si të përmirësojmë ekonominë e vendit, si të zgjidhim problemet e njerëzve. Ky është debati që kemi dhe si ta modernizojmë Partinë Socialiste dhe ta bëjmë të aftë që t’i përgjigjet të gjitha këtyre nevojave që kanë qytetarët”, tha Kokëdhima.

I pyetur nga gazetarët në jug të vendit lidhur me marrëdhëniet në koalicion, koordinatori i jugut dhe deputeti i qarkut të Vlorës ju tha se nuk ka mosmarrëveshje PS-LSI dhe se divergjencat për reformën në drejtësi ai i sheh normale.

“Është një proces i komplikuar. Është shumë normale që për një reformë të tillë partitë të kenë diferenca, të kenë ide të ndryshme dhe të kenë ide të përbashkëta.”

Kokëdhima tha se bashkëpunimi i ngushtë Rama-Meta do të vijojë. “Jemi në një koalicion, jemi pjesë e së majtës së bashkuar dhe do të shkojmë gjithmonë përmes një bashkëpunimi të ngushtë dhe do t’i afrohemi  qëllimeve tona”, tha Kokëdhima.