”Kokë më kokë”, Berisha fton Ramën në një tryezë përballje: Ai del hajduti më i madh në histori

Për herë të parë pas shumë kohësh, Sali Berisha ka një sfidë të hapur për kryeministrin Edi Rama. Ai e fton në një tryezë “kokë me kokë” dhe sipas tij t’u tregojnë se sa kanë marrë nga fondet publike familjet e Sali Berishës dhe familjes së Edi Ramës. Berisha, është i sigurt se Rama është “hajduti më i madh” i këtij vendi.

“Të vijë të ulemi bashkë. Unë jam ish-kryeministër, ai është kryeministër. T’u tregojmë shqiptarëve se sa kanë marrë nga fondet publike familjet e Sali Berishës dhe familjes së Edi Ramës. Nëse ulemi ballë për ballë, ai del hajduti më i madh në historinë e këtij vendi”, tha Berisha. Në vazhdën e kësaj deklarate, Berisha thotë se kjo është arsyeja se përse Rama mohon ngritjen e Komisioneve Hetimore.

“Këto dokumente dhe fakte tregojnë se pse Edi Rama mohon të drejtën themelore kushtetuese të deputetëve të opozitës për ngritjen e Komisionit Hetimor Parlamentar. Kjo sepse ky komision do të tregojë se si është shfrytëzuar pushteti i thjeshtrit për t’u pasuruar vajza e familjes”. Opozita kërkon ngritjen e 8 Komisioneve Hetimore, por që kundërshtohen nga mazhoranca. Për pasojë, opozita ka bllokuar zhvillimin normal të seancave parlamentare.