Komisioni i Ligjeve voton draftin për Kodin e ri Zgjedhor. 1/3 e listës e mbyllur, i hapet rruga votës së emigrantëve

Partia Demokratike dhe Partia Socialiste, votuan në Komisionin e Ligjeve draftin për Kodin e ri Zgjedhor që mundëson votën e emigrantëve dhe 1.3 e listave të mbyllura. Me vetëm një votë kundër dhe të gjitha të tjerat pro, anëtarët e Komisionit të Ligjeve miratuan draftin e propozuar për Reformën Zgjedhore. Për gati 5 orë, mbledhja e Komisionit u shoqërua me debate mes anëtarëve. Veçanërisht, ishte Enkelejd Alibeaj ai që ngriti tonet kundër draftit të përbashkët PS-PD, të cilin e quajti pazar për të ruajtur karriget.

“Ajo se çfarë po bëhet sot, nuk është se po bëhet një Reformë Zgjedhore e minutës së fundit, me një Pazar të bërë natën fshehtas, sot po i dhurohet mandati i katërt Ramës në tavolinë. S’ka nevojë sot më për zgjedhje, e ka marrë, e ka blerë pushtetin dhe mandatin e katërt. Dhe bashkë me të mbetet e vetmja gjë, si të ruajmë ndonjë karrige për vete”, tha Alibeaj.

Sa i takon propozimit për mbylljen e listës me 1/3, partitë e vogla opozitare, mes tyre edhe Alibeaj, kërkuan që lista 100% e hapur të jetë opsionale për partitë.

“Të lini opsion për partitë e tjera që nëse duan t’i lënë 100% të hapura, kjo adreson të gjitha shpresat e shoqërisë”, tha Adriatik Lapaj.

“Të paktën të jetë e mundshme, të lihet fakultative për çdo subjekt politik, kush do ta ketë të hapur ta ketë të hapur”, tha Mediu.

Por, PS është e prerë në këtë pikë, ku deputeti Damian Gjiknuri tha se ligji do të jetë uniform për të gjitha partitë.