Koncerti ndez festat në Bulqizë, Rama poston videon nga atmosfera

Në qytetin e Bulqizës janë ndezur dritat e festës. Bashkia ka organizuar gjatë gjithë këtij muaji koncerte dhe aktivitete të ndryshme për fëmijët dhe qytetarët.

Kryeministri Edi Rama ka postuar në Facebook, pamje nga sheshi qendror i zbukuruar i Bulqizës ku qindra qytetarë kanë festuar nën tingujt e muzikës. E dekoruar me pemën e Krishtlindjeve dhe dritat shumëngjyrëshe, Bulqiza është gati për të pritur festat e fundvitit.

Përveç pemës së madhe të vendosur në qendër të qytetit, vezullimi i dritave shumëngjyrëshe dhe zbukurimet e ndryshme kanë krijuar tashmë atmosferë festive në këtë qytet. Dekori i këtij viti është shtrirë gjithashtu përtej qendrës, me dritat festive të vendosura në të gjitha hapësirat publike.