Korab Lita replikon me Lleshajn për kriminalitetin në vend: Nga një pikë e zezë, Shqipëria u kthye e gjitha në Lazarat

Ministri i Brendshëm, Sandër Lleshaj, është thirrur në një interpelancë urgjente nga disa deputetë të opozitës së re në Kuvend për të folur për sigurinë në vend dhe kriminalitetin.

Deputeti Korab Lita i drejtoi nga foltorja e Kuvendit disa pyetje mbi kriminalitetin ministrit Lleshaj, ku mes të tjerash tha se Shqipëria kishte një njollë të zezë gjatë qeverisjes së PD-së, që ishte Lazarati, ndërsa tani është shndërruar e gjitha në Lazarat.

Në fjalën e tij, Lleshaj tha se prodhimi i kanabisit në Shqipëri ka rënë në nivele historike, ndërsa theksoi se edhe krimet kanë shënuar një rënie të ndjeshme, si dhe janë goditur më shumë grupe kriminale.

“Thirrja e kësaj interpelance urgjente ka të bëjë me gjendjen mjaft të rëndë, në të cilën ndodhet vendi, për sigurinë. Qeveria po përdor situatën e pandemisë për të fshehur kriminalitetin. Deri më 2013 ishte Lazarati një njollë e zezë për kanabisin në Shqipëri. Gjithë mediat botërore flisnin për këtë zonë. Me ardhjen në pushtet të kësaj mazhoranca u organizua operacioni i madh kundër kultivimit të kanabisit në Lazarat, luftë që u fitua nga policia dhe rezultoi me një dëshmor nga radhët e policisë, Ibrahim Basha, që dha jetën. Jam krenar që ai ra në krye të detyrës, por duke parë rezultatet e mëvonshme dhe gjendjen e kultivimit të kanabisit në Shqipëri mendoj nëse ja vlejti jeta e dhënë e oficerit të policisë. Pasi Shqipëria nga një pikë e zezë që ishte, u shndërrua në një Lazarat të tërë. Për këtë i kam shtruar disa pyetje ministrit të Brendshëm, mbi situatën me krimin në vend“,-tha deputeti Lita.

”Ministri më i dështuar, nëse do kishte moralin e ushtaraku nuk do ulje figurinë e policit dhe do e përçërmojë. Nëse do e kishte bërë një ministër civil edhe mund të kapërdihej, por jo një ushtarak. Ty t’i hoqën spaletat pa u bërë mirë ministër i brendshëm. Kjo të bën t’i urresh policët”- shtoi më tej Lita.