Koronavirusi mbërrin në Shqipëri, zv.kryeministri: Ruani qetësinë! Vetëkarantinim për ata që vijnë nga Italia dhe higjenë

Në një njoftim zyrtar, ministria e Shëndetësisë konfirmoi dy rastet e para me koronavirusin e ri COVID-19 në vendin tonë.

Ata janë babë e bir që kanë ardhur nga Firence e Italisë përmes rrugës tokësore nga Hani i Hotit, me makinë personale.

Zv. kryeministri Erion Braçe ka bërë thirrje për qetësi dhe vetëkontroll dhe thotë se duhet zbatuar çdo protokoll dhe çdo rregull të shpallur, duke nisur nga vetëkarantinimi i atyre që kanë hyrë në Shqipëri përgjatë dy javëve të fundit, tek higjiena dhe kujdesi për të moshuarit dhe fëmijët.

“Çdokush që ka hyrë nga Italia në Shqipëri dy javët e fundit dhe ka shenja të gripit, të telefonojë numrin 127; Çdokush që ka hyrë nga Italia në Shqipëri gjatë dy javëve të fundit duhet të vetëkarantinohet për 14 ditë; Pjesa tjetër është higjena, higjena, higjena! Lani duart shpesh dhe për 40 sekonda me ujë e sapun, dizinfektoini me solucione me bazë alkoolin;

Të gjitha vendet me grumbullime të mëdha, posacërisht shkollat duhet te 100-ishojnë kujdesin ndaj higjenës; Mos prekni gojën, hundën e sytë më duar të palara, virusi hyn në trup prej tyre! Mbroni femijët dhe të moshuarit! Është detyrë!“, shkruan Braçe.