Kosova në Qesarakë: Kurora e gjelbër, e betonizuar

Kandidati i PD për bashkinë e Tiranës, Halim Ksova, ka vazhduar turin e tij të takimeve nëpër periferitë e kryeqytetit.

Sot ai ndodhej në zonën e Qesarakës, ku është takuar me banorë dhe ka denocuar shkatërrimin e zonës.

“Qesaraka duhej të ishte kurora e gjelbër e Tiranës, një mrekulli që ia ka falur natyra qytetit tonë. Sot për fat të keq e betonizuar, e denatyruar.” – shkruante Kosova në Facebook.

Por Kosova garantoi marrje masash, duke shkruar se se “Kemi plan konkret për ta rigjallëruar këtë zonë.”

Situata politike në Maqedoni diskutohet në Kuvend. Bumçi: Shkupi drejt “putinizimit”

Situatës së tensionuar politike në Maqedoni i është kushtuar një seancë e posaçme dëgjimore në Komisionin parlamentar të Politikës së Jashtme.

Arta Dade, kryetare e këtij komisioni, në pjesën e parë të mbledhjes me praninë e medias njoftoi se përfaqësuesit e Ministrisë së Jashtme, sekretari i Përgjithshëm Qirjako Qirko dhe Bashkim Rama, drejtor për Rajonin, ishin ftuar për t’u dhënë përgjigje pyetjeve të komisionit për situatën shqetësuese në vendin fqinj dhe ngërçin e krijuar nga mosdekretimi prej Presidentit Nishani të ambasadorit tonë në Shkup.

Mbledhja ka vijuar pa praninë e medias. Në përfundim të saj, nënkryetari i komisionit Aldo Bumçi, me tone kritike dënoi atë çka është duke ndodhur në Maqedoni.

“Është shumë e qartë që kriza në Maqedoni nuk ka shkaqe etnike, por është një krizë e krijuar nga zbatimi i putinizmit. Një sistem autoritar që po zbatohet nga qeveria aktuale dhe kryeministri, i cili po kontrollon institucionet e pavarura, median, godet opozitën, dhe po zbaton modelin e Putinit në Maqedoni. Një shqetësim i ngritur nga Sekretari amerikan i Shtetit dhe zyrtarë të tjerë të lartë perëndimorë, për këtë rrezik të dobësimit të demokracisë në Europën Lindore dhe në Ballkan”, tha Bumçi.

Ai akuzoi Ministrinë e Punëve të Jashtme si shkaktaren e ngërçit në emërimin e ambasadorit të ri në Shkup, pasi sipas tij, tashmë ka vetëm ambasadorë politikë, gjë që e ka kundërshtuar Presidenti i Republikës, Bujar Nishani.