KQZ rrëzon kërkesën e PS, miraton fletën e votimit për zgjedhjet e 25 prillit

Më 25 prill, shqiptarët do të shkojnë në qendrat e votimit për të votuar partinë dhe kandidatin e preferuar, pasi në fletë do të jenë të shënuar emrat e kandidatëve për deputetë dhe jo me numra.

Komisioneri Shtetëror i Zgjedhjeve, ka miratuar këtë të enjte fletën e votimit për zgjedhjet e 25 prillit. Në fletë, krahas subjekteve politike, do të jenë të renditur edhe kandidatët për deputet ku do të kenë të shënuar edhe emrin dhe mbiemrin e tyre.

Për miratimin e fletës së votimit pati debate të ashpra mes palëve. PS-ja kërkonte që të miratohej modeli me numra, ndërsa PD-ja argumentoi se kjo mënyrë bie në kundërshtim me listat e hapura.

Komisionieri Ilirjan Celibashi tha se ”Në vlerësim të asaj që është parashtruar vendos rrëzimin e kërkesës së PS për shqyrtimin e fletës së votimit. Vendos miratimin e fletës së votimit, duke u përshtatur sipas numrit të kandidatëve. Kjo do të jetë fleta e votimit. Kundër këtij vendimi mund të behët ankim brenda tre ditëve në KAS”.