KQZ rrëzon PD-në, të gjithë votuesit në votime

Nisin përplasjet  e para, një ditë para zgjedhjeve. Komisioni Qendror i Zgjedhjeve ka rrëzuar paraditen e së shtunës kërkesën e Partisë Demokratike për çregjistrimin e votuesve që ajo pretendon se janë fiktivë.

Nga informacionet e fundit rezulton se kërkesa është hedhur poshtë me 4 vota kundër dhe 3 pro saj.

Edhe në mbledhjet e mëparshme të Komisionit, partia më e madhe e opozitës ka përsëritur vazhdimisht kërkesën në fjalë për votues që ajo pretendon se janë fiktivë, kryesisht në Durrës dhe Kavajë.

Por kryetarja e KQZ-së e ka kundërshtuar kërkesën në fjalë me argumentin se, për sa kohë çështja është duke u hetuar nga organet e drejtësisë, askush nuk ka tagër të ndërhyjë dhe të vendosë për kërkesa të ndryshme të partive politike.