Kryemadhi bashkëbisedim me Raporteren në PE: Çdo alibi për të prishur dakordësinë e 5 qershorit është thjesht tentativë për të vrarë dialogun dhe perspektivën evropiane

Kryetarja e Lëvizjes Socialiste për Integrim Monika Kryemadhi dhe kryetari i Partisë Demokratike Lulzim Basha zhvilluan sot një bashkëbisedim virtual me Raporteren për Shqipërinë në Parlamentin Evropian, znj. Isabel Santos.

Detaje nga ky bashkëbisedim miqësor njofton kryetarja e LSI-së, e cila përmes rrjeteve sociale thekson se së bashku me kryedemokratin Basha u rikonfirmua dhe njëherë që Opozita e Bashkuar përtej prioritetit për të përballuar sfidën ndaj Covid-19 dhe pasojave ekonomike të saj, mbetet e angazhuar plotësisht në përmbushjen e të gjitha kushteve që kanë të bëjnë me procesin e integrimit evropian të Shqipërisë.

Kryemadhi bën me dije se i kanë raportuar eurodeputetes edhe situatën e krijuar pas provokimit të Edi Ramës me shembjen e Teatrit, ku ajo ka theksuar se pavarësisht kësaj ngjarjeje, Opozita e Bashkuar ishte e vendosur të finalizonte Reformën Zgjedhore.

Në këtë kontekt, Kryemadhi thotë se në një Parlament me vetëm 122 deputetë, mazhorancës i nevojiten vetëm 73 vota për të miratuar ligjin e ri elektoral. Ndaj, thotë kryetarja e LSI-së, çdo alibi për të prishur dakordësinë e 5 qershorit është thjesht tentativë për të vrarë dialogun politik në vend dhe perspektivën evropiane të Shqipërisë.

Njoftimi i plotë i kryetares së LSI-së Monika Kryemadhi

Nën sfidën e një takimi virtual bashkë me z.Basha zhvilluam sot një bashkëbisedim miqësor me Raporteren për Shqipërinë në Parlamentin Evropian, znj. Isabel Santos.

Rikonfirmuam dhe njëherë që Opozita e Bashkuar përtej prioritetit për të përballuar sfidën ndaj Covid-19 dhe pasojave ekonomike të saj, mbetet e angazhuar plotësisht në përmbushjen e të gjitha kushteve që kanë të bëjnë me procesin e integrimit evropian të Shqipërisë.

Edhe pse kryeministri i vendit provokoi opozitën dhe qytetarët shqiptarë me shembjen e Teatrit Kombëtar në mes të pandemisë, përmes vendimeve të falsifikuara, përdorimit të policisë private pa asnjë numër identifikimi dhe ushtrimit të dhunës së paprecedentë kundrejt qytetarëve dhe artistëve, Opozita e Bashkuar ishte e vendosur të finalizonte Reformën Zgjedhore, në bashkëpunim me faktorin ndërkombëtar, për t’i hapur rrugë zgjedhjeve të lira në vend dhe për të plotësuar një nga kushtet thelbësore për çeljen e negociatave të Shqipërisë.

Në një Parlament me vetëm 122 deputetë, mazhorancës i nevojiten vetëm 73 vota për të miratuar ligjin e ri elektoral. Ndaj çdo alibi për të prishur dakordësinë e 5 qershorit është thjesht tentativë për të vrarë dialogun politik në vend dhe perspektivën evropiane të Shqipërisë.