Kryeministri britanik: Marrëveshja me Shqipërinë uli me 90% numrin e emigrantëve të paligjshëm në Britani

Në dhjetor të vitit të kaluar Kryeministri Rama dhe homologu i tij britanik Rishi Sunak nënshkruan një marrëveshje për të trajtuar çështjet që lidhen me kërkesat për azil dhe kthimin e emigrantëve të paligjshëm shqiptarë nga Britania e Madhe.

8 muaj më pas kjo marrëveshje ka dhënë efektet e saj duke bërë që të ulet në mënyrë drastike numri i emigrantëve shqiptarë në këtë vend.

Në një video postuar në Twitter, Rishi Sunak nënvizon se falë marrëveshjes me Shqipërinë ka rënë me 90% numri i emigrantëve shqiptarë që i drejtohen vendit të tij:

“Pesë gjërat që po bëj për të ndalur emigrantët:

– Kushdo emigrant që do të mbërrijë në Britani në mënyrë ilegale nuk do të mund të qëndrojë pavarësisht përpjekjeve të shumta që mund të bëjë, duke marrë parasysh ligjet e reja që priten të hyjnë në fuqi së shpejti.

– Qeveria britanike ka nënshkruar një marrëveshje me Francën për të ndaluar kalimin e emigrantëve përpara se të kalojnë Kanalin. Kemi nënshkruar gjithashtu një marrëveshje me Shqipërinë e cila ka ndihmuar në uljen e numrit të emigrantëve që mbërrijnë në Britani, me 90%.

– Kemi rritur me 50% bastisjen për punëtorët ilegalë gjithashtu.

– Farsa e emigrantëve të paligjshëm që qëndrojnë në hotele nga taksapaguesit do të ndalojë.

– E vetmja mënyrë për të qëndruar në Britani do të jetë nëpërmjet rrugëve legale. E di që ndalimi i emigrantëve është një prioritet për britanikët dhe nuk do të lëmë gur pa lëvizur derisa të arrijmë qëllimin tonë.”