Kryeministri nxjerr pamjet: Qendra e legjendës së tenisit Rafa Nadal do hapë dyert në Durrës

Në një takim të përzemërt mes Rafa Nadal dhe kryeministrit shqiptar Edi Rama, u njoftuan planet për hapjen kompleksit Qendra Sportive Rafa Nadal në Shqipëri.

Qyteti bregdetar i Durrësit do të presë një kompleks multi-sportiv që do të zbatojë metodologjinë e trajnimit të Akademisë Rafa Nadal by Movistar.

“Dhe me lajmin e mirë se Qendra Sportive e legjendës së tenisit RAFA NADAL do të hapë dyert në Durrës për fëmijët dhe të pasionuarit e këtij sporti nga Shqipëria e rajoni, krah për krah me Akademinë e Futbollit të Manchester City-t, ju uroj një ditë të mbarë”, shkruan Rama, ndërsa ka nxjerrë dhe pamjet nga nënshkrimi i marrëveshjes për hapjen e kësaj qendre sportive.

Qendra Sportive Rafa Nadal në Shqipëri do të ketë 12 fusha tenisi, 6 fusha padel, një fushë multi-sportive, një palestër dhe zonë Wellness, një pishinë dhe një zonë restoranti. Përveç kësaj, do të ketë një dyqan dhe një muze me disa nga trofetë e Rafa Nadal dhe objekte të tjera të dhuruara nga atletë të mëdhenj.