Rama: Kemi nisur punën për samitin e NATO-s në Tiranë

Kryeministri Edi Rama ka nisur sërish komunikimin me qytetarët në rrjetet sociale, përmes rubrikës së tij “Sy m’sy”.

Ditën e sotme kreu i qeverisë komentoi zhvillimet e fundit politike dhe diplomatike të Shqipërisë.

Rama deklaroi se Shqipëria po vijon me ritëm të shpejtë procesin e negociatave për anëtarësimin në Bashkimin Evropian dhe se së shpejti pritet të hapet një tjetër grup kapitujsh. Ai theksoi se qëllimi mbetet hapja e të gjithë kapitujve brenda një afati të arsyeshëm.

Rama foli edhe për Samitin i Komunitetit Politik Evropian, i mbajtur së fundmi në kryeqytetin shqiptar, duke e cilësuar atë ngjarje si një sukses të jashtëzakonshëm, jehona e të cilit vazhdon ende në korridoret e politikës evropiane.

Ndërkohë, kryeministri konfirmoi se ka nisur puna për organizimin e Samitit të NATO-s në Tiranë, një ngjarje që kërkon përgatitje shumëvjeçare. “Grupi i inspektimit nga NATO në Bruksel ka ardhur për të analizuar opsionet dhe për të inventarizuar kapacitetet tona logjistike dhe infrastrukturore,” tha Rama.