Kryetari i Bashkisë së Durrësit, Vangjush Dako, betohet para këshillit bashkiak

Kryetari i Bashkisë së Durrësit, Vangjush Dako, ka bërë sot betimin në këshillin bashkiak të qytetit për mandatin e tij të tretë në krye të Bashkisë së Durrësit.

Në ceremoninë e betimit të kryebashkiakut Dako ka qenë i pranishëm ministri i Shtetit per Ceshtjet Vendore, Bledi Çuçi dhe ministri i Mirëqënies Sociale e Rinise e njëkohësisht deputet i Durrësit, Blendi Klosi.

Betimi i kryetarit të Bashkisë, Vangjush Dako, është përfshirë në rendin e ditës së mbledhjes së parë të këshillit bashkiak për mandatin e ri. Në këtë mbledhje u krye kostituimi i këshillit të ri bashkiak si dhe u procedua me zgjedhjen e kryetarit të këshillit bashkiak. Në votim morën pjesë 51 anëtarë të këshillit bashkiak, ku me shumicë votash u zgjodh kryetar i këshillit bashkiak Alban Ramohitaj dhe nënkryetar i këtij këshilli Artur Bujari, që të dy përfaqësues të Aleancës për Shqipërinë Evropiane. Po ashtu, këshilli bashkiak ka zgjedhur edhe anëtarët për këshillin e Qarkut.

Kryetari i Bashkisë së Durrësit, Dako, pas betimit theksoi se “Bashkia e Durrësit ka prioritet përmirësimin e jetesës së qytetarëve durrsakë nëpërmjet investimeve të mëdha që po transformojnë përditë e më shumë imazhin e një qyteti turistik si Durrësi dhe se interesat e qytetit dhe qytetarëve durrsakë”.

Kryebashkiaku Dako deklaroi gjithashtu se të gjitha ato zotime që ai ka marrë do t’i bëjë realitet dhe do të punojë për të gjithë qytetarët e Durrësit pa asnjë dallim, sepse “për ne dhe qytetarët janë të gjithë njësoj dhe ne do t’u shërbejmë të gjithëve me përkushtimin maksimal. Ky mandat është mjaft i rëndësishëm në zhvillimin e mëtejshëm të qytetit. Tashmë me ndarjen e re territoriale kemi mundësi t’i shërbejmë një komuniteti më të madh qytetarësh. Garantoj se do të jem gjithnjë në shërbim të të gjithë qytetarëve pa marrë parasysh bindjet e tyre politike, pasi të gjithë qytetarët meritojnë njëlloj shërbime dhe për në të gjithë qytetarët janë njësoj”, theksoi ai.