Kuvendi këtë të enjte, 23 deputetë të PD janë të përjashtuar. Ja ligjet që do votohen

Në seancën plenare këtë të enjte, në Kuvend nuk do të jenë 23 deputetë të PD-së, pasi janë të përjashtuar për shkak të bllokimit të seancave të mëparshme.

Por PS-ja do të kalojë në votim projektligje me rëndësi të lartë. Projektligji për lojërat e fatit, tashmë i ndryshuar pritet të marrë votën e socialistëve në seancë plenare, duke i hapur zyrtarisht rrugë ushtrimit të këtij aktiviteti vetëm online. PS-ja do të ngrejë kartonin jeshil edhe për projektligjin për Prokurimin Publik, i cili përveç përafrimit me legjislacionin e BE, ka si qëllim përdorimin e Inteligjencës Artificiale nëpër tendera.

I vetmi ngërç që mund të krijohet është nga dekreti i presidentit për dekoratat, ligji i parë i kthyer për shqyrtim nga Bajram Begaj, i cili kundërshtoi marrjen e kompetencave nga ana e qeverisë për dhënien e dekoratave. Për votimin e këtij dekreti do të duhen 84 vota, që e vetme PS-ja nuk mund t’i sigurojë. Nuk dihet nëse votat do ti japë PD-ja e Bashës.