Kuvendi voton sot për komisionin hetimor për shkarkimin e Presidentit

Parlamenti i Shqipërisë do të hedhë sot për votim, projektvendimin për ngritjen e Komisionit hetimor për shkarkimin e Presidentit Ilir Meta.

Në agjendën me 21 pika të parlamentit që mblidhet në orën 10:00 këtë të premte, firmosur nga Kryetari Gramoz Ruçi, kjo pikë është e 20-a në radhë, pas votimit të disa dekreteve të Metës, me anë të të cilave ai i ka kthyer mbrapsht Kuvendit për rishqyrtim disa ligje.

Konkretisht, në pikën 20 thuhet: “Projektvendim “Për miratimin e raportit dhe propozimit të komisionit për Çështjet Ligjore, Administratën Publike dhe të Drejtat e Njeriut për ngritjen e një komisioni hetimor, bazuar në kërkesën e një grupi deputetësh për shkarkimin nga detyra të Presidentit të Republikës”.