Liderët në tryezën e paqes, presidenti Zelensky mbërrin në Shtëpinë e Bardhë dhe tregon qëllimin kryesor

Liderët e Europës janë në tryezën e paqes në Shtëpinë e Bardhë. Presidenti ukrainas Volodymyr Zelensky, thotë se qëllimi është paqe e besueshme dhe e qëndrueshme për vendin e tij dhe të gjithë Evropën.

Pak para takimit me presidentin Trump, ai shkruan në X se SHBA-ja, Evropa dhe të tjerët duhet të ushtrojnë presion mbi presidentin e Rusisë. Sipas tij askush nuk duhet të presë që Vladimir Putin të heqë dorë vullnetarisht nga agresioni dhe përpjekjet e reja për pushtim.

“Qëllimi ynë kryesor është një paqe e besueshme dhe e qëndrueshme për Ukrainën dhe për të gjithë Evropën. Dhe është e rëndësishme që vrulli i të gjitha takimeve tona të çojë pikërisht në këtë rezultat. Ne e kuptojmë se nuk duhet të presim që Putini të braktisë vullnetarisht agresionin dhe përpjekjet e reja për pushtim. Kjo është arsyeja pse presioni duhet të funksionojë, dhe duhet të jetë presion i përbashkët – nga Shtetet e Bashkuara dhe Evropa, dhe nga të gjithë në botë që respektojnë të drejtën për jetë dhe rendin ndërkombëtar”, u shpreh Zelensky.

Nga ana tjetër presidenti i Ukrainës ka mbërritur në Shtëpinë e Bardhë dhe është pritur nga Trump. Rusia ka përsëritur refuzimin e saj të prerë ndaj çdo skenari që parashikon vendosjen e trupave të vendeve të NATO-s në Ukrainë. “Është e papranueshme dhe do të sillte një përshkallëzim të pakontrolluar të konfliktit, me pasoja të paparashikueshme”, deklaroi zëdhënësja e Ministrisë së Jashtme të Rusisë, Maria Zakharova.