Lindita Nikolla: Ka ardhur koha që të bëjmë një paketë ligjore për të mundësuar votën e emigrantëve

Kryetarja e Kuvendit, Lindita Nikolla në fjalën e saj mbajtur në Konferencën Kombëtare për votën e emigrantëve tha se “tani ka ardhur koha që të bëhet paketa ligjore që do mundësojë për herë të parë votimin e shtetasve me vendbanim jashtë Shqipërisë”.

“Vetëm përfitime do ketë qeverisja në gjithë nivelet nëse baza e tyre zgjerohet e numri i votuesve rritet përfshirë dhe emigrantët. Do zhdukë asimetrinë mes pjesëmarrjes politike elektorale dhe pjesëmarrjes ekonomike të diasporës në zhvillimin e vendit.

Shqipëria është një nga vendet me varësi të remitancave të emigrantëve. Masat e programet qeveritare për mbështetjen e investimeve apo lehtësimin e kthimit virtual e fizik të emigrantëve të vijojnë me masat e lehtësimit të pjesëmarrjes së tyre në proceset politike e elektorale.

Votimi jashtë vendit është i vlefshëm e sfidues e duhet të përmbushë standardet tona e të emigrantëve shqiptarë. Duhet të hedhim një hap të vendosur drejt të cilit do bëhet votimi nga jashtë vendit”, tha Nikolla.