Lindita Nikolla pret Kryesuesen e OSBE-së: Me opozitën thellojmë bashkëpunimin për avancimin e reformave

Kryetarja e Kuvendit, Lindita Nikolla, priti Kryesuesen e rradhës të OSBE-së, Ministrien e Jashtme të Suedisë, Ann Linde. Në takim ishin edhe nënkryetarët e Kuvendit, Ermonela Felaj dhe Enkelejd Alibeaj. Nikolla e falënderoi për mbështetjen që Suedia i dha Kryesisë shqiptare të OSBE-së si edhe vetë Organizatës, si edhe vlerësoi punën e Kryesisë Suedeze në kryesimin e OSBE-së vitit 2021, nëpërmjet dialogut e bashkëpunimit, për një Europë më të qëndrueshme e të sigurtë.

”Shqipëria dhe në mënyrë të veçantë Kuvendi, do të vazhdojnë bashkëpunimin e suksesshëm me OSBE-në për avancimin dhe thellimin e reformave, përmirësimin e standarteve të zgjedhjeve, konsolidimin e institucioneve demokratike, luftën kundër krimit të organizuar e korrupsionit, promovimin e qeverisjes së mirë dhe forcimin e shoqërisë civile. Me opozitën në Kuvend, si një aset i demokracisë dhe i parlamentit, do të thellojmë bashkëpunimin duke zgjeruar aksesin e saj për të kontribuar në avancimin e reformave”,- vuri në dukje Kryetarja e Kuvendit.

Nikolla shprehu mirënjohjen për mbështetjen e vendosur të Suedisë për rrugëtimin evropian të Shqipërisë dhe çeljen e negociatave. Alibeaj dhe Felaj shprehen qëndrimet e tyre të ndryshme mbi zgjedhjet e 25 prillit dhe funksionimin e institucioneve demokratike.

Ann Linde e uroi Kryetaren e Kuvendit për zgjedhjen dhe shprehu vendosmërinë e OSBE-së për të bashkëpunuar me Shqipërinë për avancimin e tre prioriteteve të Organizatës: siguria, demokracia e sundimi i ligjit dhe barazia gjinore. Është e rëndësishme që opozita është në Kuvend dhe të gjitha palët shprehin perspektivën dhe qëndrimet e tyre, nëpërmjet dialogut politik dhe respektimit të qëndrimeve e vlerësimeve të ndryshme.