LSI: Acarimi i panevojshëm, PD: Po synojnë të zvarrisin ligjin

“Nuk ka asnjë kthim pas për procesin e dekriminalizimit” deklaron kryetari i Grupit Parlamentar të LSI-së Petrit Vasili.

Vasili tha se konfliktualiteti është tërësisht i panevojshëm pasi ajo çka është arritur deri tani është shumë dhe ajo që ka mbetur është më e pakët.

Petrit Vasili: ”Kam bindjen se do shkojmë drejt një konsensusi të ri pasi acarimi është i panevojshëm. Ajo që kemi arritur pë të gjetur konsensus është më e pakët nga ajo që kemi arritur me ligjin e dekriminalizimit. Është ushtrim më i lehtë nga ai që na shoqëroi” tha Vasili duke e mbyllur me deklaratën se “Jam opmisit se konsensusi do të arrihet“

Formularët e vetëdeklarimit prishën konsensusin për miratimin e akteve nën ligjore për ligjin e dekriminalizimit në Këshillin e mandateve dhe Imunitetit.  Pas mbledhjes që zgjati për gati 4 orë mbrëmjen e 2 marsit, socialisti Taulant Balla tha se propozimet e Partisë Demokratike tejkalojnë ligjin.

Ndërkohë Bylykbashi i PD-se në një prononcim për median deklaron se PS po përpiqet të prishë konsensusin e arritur më 17 dhjetor 2015.

Oerd Bylykbashi: Konsesusi u arrit që në dhjetor. Ajo që po ndodh deri mbrëmë dhe që vazhdon, është që mazhoranca po përpiqet që konsensusi i 17 dhjetorit të prishet. Është detyrim i Parlamentit të miratojë pikë për pikë atë që kërkon ligji. Formulari i deklarimit të Partisë Demokratike i jep mundësinë ligjit të dekriminalizimit të zbatohet plotësisht. Ajo që kërkon Partia Socialiste me formularin e saj, synon të cungojë thelbësisht mundësinë e prokurorisë që të kërkojnë çdo të dhënë të personave që kanë rekorde kriminale. Qëllimi është vetëm një: që kriminelët të shpëtojnë. Ne nuk pranojmë që nëpërmjet një formulari që propozon Partia Socialiste, kriminelët të mbeten në Parlament dhe në administratë.

E vetmja alternativë është formulari i FBI-së. Formulari është instrumenti që mbledh të dhëna, dhe jo për zbatimin e ligjit. Formulari është kushti dhe jo instrument për të shmangur zbatimin e ligjit. Mbeten edhe pak hapësirë për të parë nëse mazhoranca do të tërhiqet.

Mos harroni që dje qe një tentativë e turpshme për ta quajtur ligjin antikushtetues nga stafi i Kuvendit, tentativë e pastër për të vonuar zbatimin e ligjit.

Nëse ne nuk i japim zgjidhje fenomenit që deputeti Prenga ilustron, pra duke pranuar Parlamenti amendamentin e PD-së dhe kjo kategori e rrezikshme të largohet nga Kuvendi nëpërmjet ligjit të dekriminalizimit.
Çdo lloj tentativë tjetër është zvarritje. Nëse vazhdohet me atë që u bë dje sigurisht që nuk do të kemi asnjë lloj zgjidhje. Ajo që ndodhi dje ishte vetëm tentativë për zvarritje.