Luan Rama në Vorë: Basha e ka braktisur Tiranën

Lëvizja Socialiste për Integrim, në kuadër të takimeve me strukturat e saj për zgjedhjet lokale të 21 qershorit, është ndalur në Vorë. Luan Rama, Sekretari i Përgjithshëm i kësaj partie, ka zhvilluar një takim me strukturat e LSI-së në këtë bashki, nga ku i ka cilësuar zgjedhjet e 21 qershorit si një moment historik për të gjithë shqiptarët.

Rama është shprehur se kryetari aktual i Bashkisë së Tiranës, njëkohësisht edhe kryetar i opozitës, Lulëzim Basha, nga frika e humbjes e ka braktisur totalisht Tiranën. Ai është shprehur gjithashtu se, LSI dhe koalicioni qeverisës do të fitojë në zgjedhjet e 21 qershorit sepse shqiptarët i besojnë. “Koalicioni qeverisës do t’jua kthejë Tiranën dhe Vorën qytetarëve”, është shprehur Sekretari i Përgjithshëm i LSI-së.

Reagon Bashkia e Tiranës: Basha ka dëshmuar se di të mbajë premtimet

Bashkia-Tiranes1-466×35013 (1)Ndërkohë Bashkia e Tiranës ka reaguar ndaj deklaratave të Sekretarit të Përgjithshëm të LSI-së, Luan Rama në Vlorë, duke thënë se, “Lulzim Basha ka dëshmuar në çdo funksion publik se di të mbajë premtimet. “Lulzim Basha i ka dhënë Tiranës vizionin e një qyteti modern dhe europian me Bulevard të ri, Terminal multimodal, transport modern pasagjerësh me tram, 200 projekte të realizuara në infrastrukturë, kopshte, shkolla e çerdhe, 25 mijë vende të reja pune, etj.”, thuhet në njoftimin për shtyp të Bashkisë.