Luljeta Bozo hap seancën e parë: Socialistë e demokratë, të punojmë pa ngjyra partiake

Pas zgjedhjeve të 25 prillit, këtë të premte nisi punën legjislatura e 10 e Kuvendit të Shqipërisë. Seancën hapëse e kryesoi inxhinjerja Luljeta Bozo, e cila ka mbi supe 78 vite 11 muaj e 8 ditë jetë, ndonëse shkel për herë të parë pragun e Parlamentit.

”Ne jemi këtu, të ardhur nga një proces demokratik. Të gjithë të punojmë për të mirën e vendit tonë”, tha Bozo. Numërimi i votave të 25 prillit prodhoi në sallën e Kuvendit 2 grupe parlamentare, PS dhe PD.

Socialistët për herë të dytë do të mund të jenë shumicë me 74 vota në parlament kësisoj edhe si grupi më i madh parlamentar.

Lindita Nikolla është e përzgjedhura e socialistëve për të drejtuar Parlamentin në këtë legjislaturë. Procedura saktëson se emri i saj do të duhet të propozohet nga të paktën 15 deputetë, ndërkohë që zgjidhja zhvillohet pa debat dhe me votim të fshehtë.