Manjani: Përzgjedhja e gjyqtarëve për çështjet si lotari kombëtare

Ministri i Drejtësisë, Ylli Manjani, në një tryezë për “Të ardhmen e menaxhimit të çështjeve të gjykatave”, deklaroi se përzgjedhja e gjyqtarëve për gjykimin e çështjeve duhet të bëhet me short elektronik.

Përmes kësaj zgjidhjeje, tha Manjani, do të rritet besimi i publikimit te gjykatat.

“Është bërë kjo punë si lotari kombëtare, që dihet se kush është gjykatësi i Apelit që do ta gjykojë çështjet. Fatkeqësisht kjo ka ndodhur. Kjo është çështja e parë. Sigurisht unë nuk jam këtu për të hedhur poshtë sistemin apo për të thënë kush është më e mira apo më e keqja. Problemi kryesor për të cilën jemi mbledhur kështu është çfarë mund të bëjmë për këtë sistem. Unë jam gati ta mirëkuptoj Gjykatën e Tiranës për ta aplikuar këtë sistem, por nuk arrij të kuptoj se si mund të vihet në diskutim autoriteti i shtetit shqiptar. Një gjykatë del më vete, një gjykatë tjetër ka një sistem tjetër. Asgjë e integruar në funksion. Besimi i publikut tek gjykata bie kur gjykatësi është i paracaktuar dhe sado të jetë i mirë ai vendim, në sekondë shumëzohet me zero”.