Arrihet marrëveshja: Byroja e Hetimit, në varësi të prokurorisë

Mazhoranca dhe opozita arrijnë dakordësinë për ngritjen e Byrosë Kombëtare të Hetimit.

Burime brenda Komisionit të Reformës në drejtësi po bëjnë me dije se palët kanë rënë dakord që Byroja të jetë në varësinë e Prokurorisë së Përgjithshme.

Kujtojmë se komisioni i posaçëm parlamentar për reformën në drejtësi është mbledhur paraditen e sotme për të rinisur dialogun politik për reformën në drejtësi.

Mbledhja që po zhvillohet me dyer të mbyllura, vazhdon të diskutojë për çështjet e mbetura hapura mes paleve në opinionin përfundimtar të Komisionit të Venecias që lidhen me paketën e rishikuar të ndryshimeve kushtetuese.

Pikat e mbetura pezull parashikohet t’i shtrohen për zgjidhje ekspertëve të misioneve ndërkombëtare të drejtësisë, EURALIUS dhe OPDAT.

Thelbi i mosmarrëveshjeve, sipas opozitës, lidhet me Këshillin e Emërimeve, ku ajo kundërshton procesin e emërimit të funksionarëve në sistemin e drejtësisë, që nuk garanton pavarësi.

Reforma në drejtësi hyri në ngërç pas mosdakordësive në zbatimin e rekomandimeve të draft-opinionit të Venecias.

Por me miratimin përfundimtar nga Komisioni më 11 mars, paketa e ndryshimeve kushtetuese i kaloi Kuvendit të Shqipërisë për miratim, i cili pritet ta kalojë brenda ketij muaji reformën më të rëndësishme për politikën shqiptare, që është dhe kushti kryesor për çeljen e negociatave për anëtarësim ne BE.