Marrëveshja PS-Rithemelimi, Ambasada e SHBA-së: Të inkurajuar nga rikthimi i normalitetit në Kuvend

PS dhe Rithemelimi kanë arritur sot një dakordësi për rikthimin e normalitetit në Kuvend, dhe nuk ka munguar reagimi i Ambasadës Amerikane në Tiranë. Në një deklaratë të shkurtër në platformën “X”, thuhet se SHBA është e inkurajuar nga ky lajm dhe i bën thirrje deputetëve që të bëjnë detyrën e tyre brenda parlamentit.

“Ambasada e Shteteve të Bashkuara në Tiranë është inkurajuar nga njoftimi për rikthimin e rendit normal në Parlament. Institucionet funksionale janë thelbësore për çdo demokraci të shëndetshme dhe anëtarët e zgjedhur duhet të ushtrojnë detyrat dhe përgjegjësitë e tyre në mirëbesim brenda Parlamentit”, thuhet në reagim.

Ky reagim erdhi pasi dy krerët e grupeve Bledi Çuçi dhe Gazment Bardhi deklaruan se ka një dakordësi për ngritjen e dy komisioneve hetimore të kërkuara nga opozita dhe pikërisht atë që ka të bëjë me ndërhyrjen në sistemin TIMS, teksa tjetri me koncesionet në shëndetësi.