Mbështetje masive për Benet Beci në Rrugën “Isuf Sokoli”: Banorët e Rajonit Nr. 1 i bashkohen vizionit për Shkodrën

Kryetari i Bashkisë së Shkodrës, Benet Beci, vijon takimet me qytetarët në kuadër të projektit të tij për transformimin e qytetit. Ditën e sotme, ai u ndal në bllokun e pallateve në rrugën “Isuf Sokoli”, ku u prit me entuziazëm nga banorët e Rajonit Nr. 1.

Beci u shpreh mirënjohës për mbështetjen e madhe që po merr nga komuniteti, duke theksuar se kjo frymë pozitive dhe bashkëpunuese është një tregues i qartë i besimit që qytetarët kanë për ndryshimet e pritshme në katër vitet e ardhshme.

“Një mbështetje e madhe dhe një frymë fitoreje nga çdo banor që na beson dhe na bashkohet për transformimin e Shkodrës. Mirënjohje për secilin prej tyre që qëndron krah nesh në këtë rrugëtim për Shkodrën,” u shpreh Beci në rrjetet sociale.

Vizitat e tij në lagje të ndryshme të qytetit janë kthyer në një forum të hapur komunikimi me qytetarët, ku kryebashkiaku dëgjon nga afër shqetësimet dhe sugjerimet e tyre për të ndërtuar një Shkodër më të zhvilluar, më të pastër dhe më afër qytetarit.