Mbeti jashtë Parlamentit. Pandeli Majko: Bëra fushatë për partinë, veten e kalova në plan të dytë

Ish-kryeministri Pandeli Majko u rendit i 19-ti në Tiranë, por votat preferenciale për Fatmir Xhafajn dhe Ornaldo Rakipin, e skualifikuan Pandeli Majkon, duke humbur kështu mandatin e deputetit. Teksa poston një foto të vjetër ku mbështetës të tij mbajnë flamurin e Partisë Socialiste, Majko thekson se pavarësisht se është ndër 10 më të votuarit, sërish mbetet jashtë Parlamentit për shkak të sistemit.

Reagimi i plotë:

Miq, megjithëse matematika më rendit në 10 kandidaturat e votuara në qarkun e Tiranës, në zgjedhjet e 25 prillit, unë nuk do të jem deputet në Kuvendin e Shqipërisë.

Sistemi elektoral është ky që kemi pranuar. Përvoja më ka mësuar se duhet të jesh i gatshëm të shohësh atë që ekziston.

Isha i bindur se do ti fitonim 19 mandate në Tiranë. Ndaj fushatën për numrin tim personal 19 e kalova në plan të dytë. Edhe për këtë arsye, rezultati nuk është një përrallë që e mposht me logjikë.

Ju falenderoj që votuat për numrin 12, Partinë Socialiste!

Sic do të thoshte im atë ndjesë pastë,… “19-ta kërkon leje për tu ulur në aeroport!” Ju jam mirënjohës që më bëtë ky që jam.

Shpresoj tu kem dhënë “everything”! Mirupafshim!

Pandi