Mbyllet protesta para Kryeministrisë

Pas më shumë se 120 minuta, edhe këtë ditë të dielë protesta e pestë qytetare para Kryeministrisë u mbyll me paralajmërimet se çdo ditë do të ketë tubime.

Protesta nisi në orën 11:00 në sheshin “Shkënderbej” dhe më qytetarët pas marshuan drejt sheshit përpara Kryeministrisë ku kanë qëndruar për afro dy orë. Ata janë shprehur të vendosur për të vijuar revoltën e tyre dhe paralajmëruan protestë çdo ditë të javës në orën 17:00, ndërsa ditën e shtunë do të kenë marshim.

Thirrjet e protestuesve vijojnë që të njëjta. “Nuk dorëzohemi, kërkojmë një jetë me dinjitet, ashtu siç e meritojmë”. Personat që morën fjalën në shkallaren para kryeministrisë, apeluan për unitet dhe për dalje masive në protesta. “Ju jeni e vetmja shpresë e këtij vendi. Të ndryshëm, por me të njëjtin hall”.

Kurse një orë para protestës së sotme, kryeministri Edi Rama doli kundër qytetarëve duke ju rikujtuar se gjendja e krijuar është prej një lufte dhe në situatë lufte, krizat janë të pritshme. Kreu i qeverisë sqaroi edhe paketën sociale, për të cilën theksoi se gjysmë milioni njerëz do të marrin për 3 muajt e ardhshëm 30 mijë lekëshin.